講今次呢個題目之前,首先我要重申一次,以政府同藍絲嘅角度嚟講,香港電台係個眾所鳩知嘅"關公"電台,用納稅人錢,做同政府意見相左嘅黃絲味節目,所謂嘅身在曹營心在漢之類啦。之前有個"左右紅藍綠"嘅節目,改名真係中,不過叫黃藍綠可能會仲好D。

返嚟今日呢個題目,最近港台"我係乜乜乜"節目入面搵黎兩個男神,一個係新男神游學修,憑著"哪一天我們會飛"同"自焚者"火紅;另一個係九十後眼中嘅離地富二代劉鳴煒。明眼人都睇得出港台將凡人男神同離地富二代擺埋一齊嘅用意,不過我失望在於年青人好似未睇到佢地嘅用意。呢一件事令到我要重新考慮,年青人係咪真係有能力"hear the undertone",睇通全局。

以港台呢一類節目,好明顯係想做到有討論價值。成個節目都係一個有政治成份嘅娛樂節目,但全香港都當真,其實都幾搞笑,就好似你睇完TVB之後觀眾相信關禮傑可以跳九哩一樣咁白痴。

如果成個節目一面倒咁揀游學修,根本就冇咁大反應同討論價值,因為港女普遍有"以貌取人學院"文憑,但係今次港台就利用港女嘅負面形象嚟賭,將港女貪錢現實嘅一面無限放大。人不為錢,天誅地滅,港男都會為錢,何況港女,三九唔識七唔通同你講感情?冇感情既時候講錢係好合理,有港女轉軚亦只係編劇手法。係人都唔會當住幾百萬人面前轉軚啦,你信的話,真係有辱自己同港女嘅智慧啦!成個節目做到個效果係,黃絲游學修有才華,有理想,敢言,但係背景唔厚。劉鳴煒平穩,不問世事,有背景,亦係社會上稱為成功嘅新一代,九十後話佢離地。呢個就係港台嘅潛劇本,冇noise就唔會紅。

根本港女只係成個節目嘅犧牲品,如果你係女人,你以後都識揀睇邊個台啦。真真假假香港人都唔識分既時候,仲有咩資格講政治呢,政治就係最黑暗,最多大話既遊戲,連少少一個娛樂節目都當真,你點有能力分辨政治既真假呢。

睇完呢個節目,身為港佬嘅我都要為港女平反。港台故意唱衰港女嚟捧高游學修,絕對係所有女人既敵人,將港女拜金推上高峰,將大家幻想倍化成超越真實嘅現實。如果個個港女都只係會貪圖劉鳴煒呢類有為富二代,香港根本冇女俾你溝,港男坐洗頭艇返大陸洗頭啦。節目名改做"我係乜乜乜"本身已經有陣政治除,加上港台做嘅其他節目亦故意推高新生代地位,每次都講夢想,理想,講以前。我第時發起上嚟,可能我自己都怕。講真,你真係發撚到先講野啦。

其實唔只港女,港男搵多幾個錢其實都只係為咗保障自己既人生,因為佢地父母上一代死慳死底嚟俾佢地擁有有時都去到個人能力以外嘅理想。唔通有女人想嫁個乞衣?想成世飲水飽?我真係唔敢住公屋囉,飲鉛水會延年益壽,但係我唔想太長命,而亦舒都話過愛情點簡單都好都起碼需要白面包。港女根本未去到完全拜金既情況,如果真睇錢至上,全香港只有三個男人俾佢揀,幾百萬年前就話性擇姐,現代人講金擇……我唔係講金澤文子,幾時到你呀傻仔。你無錢冇口才冇才華冇樣貌,唔好講溝女,工你都搵唔撚到啦,夠現實啦掛。港女亦唔係全部都好似節目入面既女士咁樣,呢個節目只係要營做港女貪錢,捧紅文青,貶低都有自己俾力打出自己江山嘅富二代。

條片出街之後,游學修高調曬女友有幾靚女,幾咁脫俗,幾咁唔稀罕港女。有時唔係話年青人有夢想唔好,或者英雄莫問出處,啱就要大大聲講出嚟,就證明你係幾咁嫩口,唔識人情世故。港女就好怕男人幼稚,例如幾十歲人仲玩高達,睇戲要睇星戰之類。有邊個女人唔想幸福快樂,衣食無憂,人生只得一次,冇人想成世為錢而煩惱。每個女人都希望將機會減低,所以冇可能冇要求。以前都好多人寫過,男人笑說女人冇波冇樣仍然咁高要求,女人亦笑說男人冇錢冇樣冇才華仍然喜歡小妹妹,用經濟學話齋呢D咪叫資源錯配囉。

冇一個國家既女人係完美,港男最愛既日本妹睇落千依百順,其實一樣係貪錢,你唔知日本男人結婚之後,所有薪金係俾女人管咩?台灣女人,貌似溫柔小女人,喺人地面前可能係俾面你,返歸先同你打摔角,不准還手。廿一世紀,冇話冇咗邊個唔得,男人唔一定要女人,女人亦唔一定要男人。

講到底,港女其實未到完全拜金嘅情況,港女只係想要一個較為美滿同無憂無慮嘅人生。錢唔需要多,但最少要養得起一個家,唔係嘅話佢點會同你講"我願意"呢,呢個係一般男人嘅誠諾,除非你得天獨厚有軟飯食。學港女話齋,我唔一定要你養,但你唔好要我養埋你囉,唔該!