100毛既《毛記電視》(毛記)自15年初開台,人氣不斷上升,近來更確定可以係NOW TV上直播佢地既二創歌曲節目,係web base既媒體中,而且仲要主打政治議題黎講真係前無古人。《毛記》係hit,我由100毛網媒年代開始睇佢地,但由《毛記電視》推出之後,反而就開始盡量唔主動接觸100毛既政治二創,我對佢地政治娛樂化既做法有所保留。近來有篇講今日既《毛記電視》就等於三十年前既《歡樂今宵》,就更令我擔心政治娛樂化帶黎既麻醉,正影響香港人抗赤化既動力。

今日既《毛記電視》就等於三十年前既《歡樂今宵》

《毛記》同《歡樂今宵》,都係成功娛樂大眾既節目。港人放工輕輕鬆鬆為睇《毛記》,睇FB comment就知唔少人真係用娛樂心態去睇政治新聞,甚至係每日例行公事式去吸收娛樂,如果欠缺反省警惕既心,好快就會無左團火去抗爭,一切習以為常,但求花生此起彼落,今朝有酒今朝醉。《歡樂今宵》都係一個二創製作,但創作源頭係上一代每日生活營營役役點滴,由工作、消費、家庭、娛圈等事為主題,甚少政治毒素,經二創後只要無傷大雅人人可服用。但100毛所二創既係來自每日既政治荒謬、愚民手段、語言偽術、混類邏輯,全都劇毒無比,經娛樂化成為工餘飯後話題,看似是無害但對港豬們分分鐘係糖衣毒藥。由100毛各媒體受歡迎程度可見,哩種易入口既抽水花生,港人非常受落,受眾可及保守派。

我係希望100毛會續繼去創作,始終暫時要港人日日如入法院咁審理政事係無可能,但港豬墮性強烈好易就走歪抗爭路,希望100毛可以偶然用下真‧認真模式,幫忙省警港豬們。要僅記中共想要既,就係一班順民,佢地可以係親共、可以係政治冷感,亦可以係政治麻木。