我諗好多九十後都會聽過依句說話,但到底對上一次你可以用開心去形容一日嘅總結喺幾耐之前?你問我,我會答你已經耐到唔記得。冇錯,我每日都會笑,但果種笑就只係聽到一個笑話,笑左幾秒鐘然後就完果隻。咁樣算唔算係開心嘅一日?我諗如果當有一日你發現你全日都冇笑過,你嘅生活應該可以用恐怖黎形容。

細細個同同學打機,打到一件神裝已經足夠我興奮一日;同朋友出去玩,返到屋企我會覺得一日太短,我希望可以再玩落去。比阿媽鬧都好,轉個頭又換件衫趕下一場繼續玩過。但到左今時今日,就算幾個朋友難得出到黎食宵夜都好,未食到一半就已經有倦意,個腦諗緊嘅已經係「聽日仲要返工」,食完之後想做嘅事就係快啲返歸。仲有下場?唔啦,好攰,下次先啦。我諗唔止係我,好多生活喺香港嘅人都會身同感受。同朋友講開依個話題,我會笑笑口話我老啦,以前為左玩頂兩日頂都冇問題,而家就算凌晨兩點返到屋企,我已經連開電腦寫文嘅精神都冇埋。有人話人愈大愈難開心係因為要求愈高,我會話唔係我要求高咗,而係要嘅野唔同咗。人愈大要諗嘅野愈多,唔可以再隨心所欲。要開心其實可以好簡單,唔洗諗後果,同一班朋友癲返一晚就可以,但可憐嘅喺就算開心喺咁簡單都好,好多香港人都做唔到。

學生時期拍拖就算兩丁友喺條街兩份食個撈麵,放學喺商場齋行唔買最後各自返去食飯都可以開開心心過一晚。但當人大咗,大家都要返工,難得出到街自然想見耐啲。食飯睇戲行下商場買精品又唔見幾百,最後望住份糧發現想儲錢都唔係一件易事。過一排你又要開始諗將來。將來即係想定落黎,即係你想比個名份人地。但當你諗起結婚擺酒,買樓上車,隨便上網搵下婚宴套餐上車筍盤,望住個價錢,你會覺得同人拍拖就好似浪費緊佢青春咁。見家長果陣問你有冇諗過你地將來,你好想答「我有諗過,但真係只可以諗下就算」,只係你冇勇氣講出口,最後唯有以笑遮醜。細個你深信愛情可以飲水飽,但到左而家你明白到就算有愛情都好,麵包一樣喺要食。

生活喺而家嘅社會,特別係香港,只要一睇新聞其實就已經好難笑得出黎。望住政府唔知做乜、望住立法會班人狗咬狗骨、望住突然間唔見左個人、望住經濟又再變差,身為一個香港人,我真係愈黎愈睇唔到希望。今日嘈醒我嘅唔係鬧鐘,而喺一個YAHOO主編INBOX我話我知有個寫殘體字嘅人又喺我寫回鄉證篇文度講「偉論」,睇我洗唔洗理下佢。一起身就要同啲唔講道理嘅人講道理,依個就係我一日嘅開始。之後再返工、睇新聞、諗下自己人生之後點行,諗下點先可以喺依個香港掙扎求存,太陽未落山我就已經用完我瞓果幾粒鐘儲落嘅精神。寫完依篇文又已經三點,SET埋排程出文時間上轉高登話唔埋又四點,一日咁又過左去。

有人同我講過出到社會就會明白到好多事,而我諗我第一樣明白到嘅,就係出到社會,先知最難搵到嘅係開心。

一個讚好,是對我的一點支持。
如果想分享給其他朋友的話,請標明出處並附上專頁網址。
Fanpiece:http://women.fanpiece.com/moyinday/
圖片:網絡取材