有好多人話男人年紀愈大愈有味道,反而女人就會隨住時間而貶值,因為愈老愈殘咁話。容許我衰啲咁講,其實依個都只係女人比自己嘅一個籍口,因為男人同女人當年紀愈大嘅時候都係面對緊同一樣野:體能下降、皮膚變差、開始有個肚腩之如此類,男人仲要額外面對甩頭髮嘅問題添。不過除左一大堆缺點之外,人生經歷都會同時豐富起黎,到果時個人自然會散發住一種成熟氣質,男嘅會叫佬味,而女人都都有一種獨有嘅味道,叫韻味。

好多女人覺由廿三歲打後自己已經冇青春,一但踏入三字頭直頭變明日黃花咁冇人要,反而男人三十歲後先開始踏入黃金期,到時個個都會揀十八廿二嘅妹妹仔。冇錯,青春的確好吸引,因為只要你本身個樣得,唔洗點保養淨係化下淡妝都已經殺哂。但女人間本來就有一句名言:世上冇醜嘅女人,只有懶嘅女人。踏入三字頭其實都可以仲好有吸引力,不過你自然要付出更多:做多啲運動、護下膚,轉下打扮去突顯自己成熟果種味道而唔係仲去扮後生。

唔好話咁樣好慘,女人口中果班愈老愈正嘅碧咸金成武之流,如果冇勤做運動嘅話,會唔會仲KEEP到副咁FIT嘅身型?留鬚、轉LOOK都係令佢地佬味出哂黎嘅一個原因。就算係男人都唔會乜都唔做坐到三十歲就會自然有好正嘅佬味,佢地都要付出汗水同改變先會得到回報。你會唔會係條街見到個中年發福、踢住人字拖、著住菊花牌背心嘅「佬」就會話佢好有佬味好正?你只會叫佢做啊叔。望望尋晚擺完酒嘅胡杏兒,就算三十六歲我都覺得佢靚,因為佢識點樣KEEP,而且佢有實行。羅琳年過半百都可以拍寫真,因為人地都會去做運動(當然有啲野真係天生)。只係啱啱踏入三字頭嘅你可能冇咁天生麗質,但只要肯的起心肝落街跑多兩圈,用多啲面膜,同時接受自己已經唔係後生而肯去轉下個LOOK,轉行熟女路線,其實你一樣仲有市場。

好多女人到左三十之後殘哂都係得一個原因:懶。覺得自己已經冇得救,覺得做咩都冇用,唔諗方法自救,結果就變成大家口中嘅「師奶」。就算係男人都好,日日淨食唔做,終有一日變成嘅都只會係林雪而唔係碧咸。係你羨慕人地幾廿歲都仲咁正嘅時候,你要記住人地係你仲睇緊電視劇果陣,已經係街跑緊;係你勁打邊爐果陣,人地可能只係食緊糙米飯配菜心。凡事總有因果,人地粗菜淡飯做運動換返黎咪叫成果,而你乜都唔做只會係度呻而最後真係殘左,我諗應該係叫報應。