頭先落麥記落ORDER,我一埋櫃枱講:「要孖芝餐,孖芝唔要茄醬唔要青瓜,加八蚊加雞翼,薯條走鹽,飲熱朱,加多個咖啡新地。」

阿姐不甘示弱地反問:「咁孖芝要唔要芝士同肉?」

我不由得小吃一驚,但我唔會忘記自己一開始嘅目標就係咖啡新地,呢種程度啲旁枝未節點會影響到我?我鎮靜咁答:「要。」

由於新地一定要跟餐上唔可以後拎,所以我托住個餐同新地一齊上去,直到吃完雞翼、半個包同大半包薯條至開始向新地落手,𠴱時新地都只係微融,抗融度都有返咁上下。杯咖啡新地齋望落地有啲PLAIN,表面係普通嘅軟雪糕,底層有啲曲奇碎,不過就附送一小杯M記齌啡,望落去同樣平淡,總之咖啡新地嘅兩個COMPONENT都平平無奇啦。

但等我倒杯咖啡落新地時,我見證到熱力學嘅奇蹟。一開始,咖啡好似係全球暖化下淹没亞爾卑斯山嘅海洋一樣,填平雪糕嘅沆瀣,剩返純白雪糕尖好似冰山一角突出於咖啡海;好快,地心吸力發揮作用,咖啡受地核吸引湧向杯底,密度較低嘅軟雪糕(麥當勞!叫咗你唔好打咁多空氣落軟雪糕度啦!)宛若維納斯般翩然浮起,雪糕中空氣受熱膨脹變成氣泡向表面湧去(必定是與維納斯同源的泡沬!),簡直好似中學CHEM LAB入面加酸入砂糖時,一大舊黑炭自平地崛起嘅震撼場面一樣。

融合過程完成後,新地會變成咖啡牛奶呢嘅半融軟雪糕,都幾好食㗎。吃到底層曲奇碎,撈埋一齊好似食咖啡曲奇麥旋風咁(唔知大家記唔記得,好多年前咖啡同曲奇、奇趣豆一樣,係麥旋風三大巨頭之一嚟㗎。)

結論係跟餐10蚊雞嚟講,咖啡新地真係幾抵玩,淨係視覺效果都值回票價。