希律宮、希律塔群(公元前37-4年)

暴君之殿

上一篇談到希律王在馬薩達要塞這個不毛之地建造空中樓閣作行宮,而且設備奢華。事實上,希律響猶大地還修建了很多行宮,包括耶利哥(Jericho)冬宮同用佢自己個名命名既希律堡(Herodium)都有,真係夠曬自戀狂。既然行宮都咁一絲不苟,他在耶路撒冷(Jerusalem)城裡面既大宮殿又怎可能會馬虎了事?事實上,當希律開始建造馬薩達要塞的同時,耶路撒冷城內亦都大興土木,希律宮同與之比鄰希律塔群正式動工,一直到他駕崩那年(公元前4年)先至正式完工。但當希律王死後短短十年,猶大國正式被吸收成為羅馬帝國既其中一個行省,這幢宏偉而且極盡奢華既完成品就成為羅馬總督既公寓。希律王投資龐大,最後卻為他人作嫁衣裳,可以話係歷史一個很大既諷刺。


左:耶路撒冷各時代面積變化,希律王時期面積最大,比現時既舊城牆多出一截
右:公元前後既城市地圖,希律宮位於城市西面,同東面既聖殿山遙遙相對


左:耶路撒冷各時代面積變化,希律王時期面積最大,比現時既舊城牆多出一截
右:公元前後既城市地圖,希律宮位於城市西面,同東面既聖殿山遙遙相對


建築佈局

希律宮建造方式,為他在位晚期最大野心既計劃:擴建耶路撒冷聖殿山作試金石,因為兩者所用既技術同建築設計都有唔少既共通性。希律宮位於聖殿西面,哈斯蒙城牆(Hasmonean Walls)既西北角落,宮殿北方建有三座高聳既巨塔:記念戰死哥哥命名的法賽爾塔(Phasael Tower)、記念戰死摯友希皮庫斯塔(Hippicus Tower) 和他一生中最愛但亦是他親自下令殺死既米利暗塔(Mariamne Tower)。這三座巨塔相當高聳,雖然遠未及亞歷山大港(Alexandria)既燈塔,但已經足夠稱為係兩千年前既摩天大廈。

希律宮復完圖,南宮北宮之間既係碩大既御花園


希律宮復完圖,南宮北宮之間既係碩大既御花園


極盡奢華

希律宮建築主體坐落於一座巨大既人工平臺之上,平臺周界修建護土牆(retaining wall,聖殿山既擴建會用完全相同既方法,不過規模更大),大約長330米(南-北)、闊60米(東-西)、高兩層樓左右,呢個人工建成既平臺基座就是宮殿既地面層。平臺之上,又分成南宮同北宮兩幢獨立既建築物。約瑟夫所載,每幢宮殿都設有單個可容納逾百賓客的宴會廳、私人浴場、有許多許多的睡房,裡面所用的器皿大部分用純金或是純銀製造。南北兩宮之間係御花園,裡面小橋流水、鳥語花香,設有長長既林蔭步道,列設希臘式既大理石柱廊,當中放滿各種會噴水既青銅雕塑,同各地搜羅既工藝品。宮殿裡面到處都係大理石柱門廊,通往一個又一個中庭。建造希律宮的石材不是一般細塊既貨色,而是巨型既雪白大理石材(20肘x10肘x5肘,約10米x5米x2.5米,應該有過百噸)。呢d石材經精雕細琢,拼埋一齊既時候渾然成為一體。整座宮殿由大約15米高既牆保護,並設有大量瞭望塔,至少咁樣做,生性多疑既希律王或會稍微覺得有安全感吧。


希律宮復完圖-甲


希律宮復完圖-乙



三塔之宮

宮殿北面既三座希律巨塔建響擴建既城牆基座之上,當中最高最大既法賽爾塔(Phasael Tower)既基座長闊高都係20米,基座護土牆以巨石砌成。基座上的第一層係5米高既迴廊,迴廊支撐著塔既上部,上部係多層式結構,有防禦牆同小塔樓,每層都有充足既空間容納宮殿式既住所、房間、浴場,塔上可以盡覽希律宮同耶路撒冷城既市容。計算基座高度,整座塔高45米,相當於13層樓,設計上類似亞歷山大港燈塔。

希皮庫斯塔(Hippicus Tower)基座長闊約13米,高15米,裡面實心。塔內下層係一個10米深既儲水池,儲水池之上設有13米既塔樓,分成兩層有許多房間。全高40米。米利暗塔(Mariamne Tower)基座10米x10米,全高25米,雖然是最矮那座,但裡面裝修卻最豪華、最多花款,跟他以女人命名非常配合(另外兩座高大同更堅固既都係以男人命名)。


希律三塔復完圖


法賽爾塔現址,殘餘部分是古塔既基座


希律三塔現址鳥瞰圖


大城殞落

約瑟夫親歷猶太戰爭既耶路撒冷圍城戰(Titus’ Siege of Jerusalem, A.D. 70),他寫《猶太戰爭史》時身在帝都羅馬。當他寫到最尾時形容希律宮既宏偉同奢華令佢覺得往事不堪回首,佢話自己不可能完全細節將建築細節描述出黎,因為憶起就令佢思緒感到痛苦。約瑟夫亦都記錄左希律宮既下場,猶太叛軍響公元70年既耶路撒冷圍城戰時以希律宮為基地,雖然羅馬軍主帥提圖斯決定保留這宏偉既傑作,但叛軍唔小心引起火種,大火將希律宮同三座塔嚴重破壞,到而家三座塔就只有基座留傳後世。希律王既奢華,早就隨時日消逝得無影無蹤,我地只能夠憑想象全盛時既輝煌。