筆者係高達動畫迷,絕大部份嘅高達動畫我都有睇過(除左某幾部真係提唔起興趣去睇)。講好睇嘅其實好多都唔差,但如果要講最觸動到我感覺,令我最感受到人性嘅,鐵血的孤兒一定係代表作。佢唔似UC系列講果種改變世界同人類進化嘅方式,亦唔似08小隊描寫寫實戰爭為主,鐵血的孤兒當中人與人嘅關係我覺得比起打鬥更加好睇。仲有佢地為生存而不惜一切嘅決心,一路上面對同經歷人性種種險惡都帶比我係高達動畫當中小有嘅真實感。

大部份高達動畫當中,主角機師就有如被選中嘅細路一樣誤打誤撞就坐左上當代最強嘅機動戰士入面,然後係戰鬥嘅過程當中發現佢地好有天份,因為佢地就係最頂尖嘅新人類。而鐵血的孤兒當中嘅三日月係因為裝左名為阿賴耶識系統嘅裝置(仲要係三個)先令到連字都唔識多個嘅佢可以坐上高達上面作戰。比起天生就係新人類,三日月同好多細路冒住會死嘅風險仲有劇痛係發育期嘅身體裝上依個裝置,為嘅只係確保自己係集團入面能夠作出貢獻,唔會比人當成冇利用價值嘅垃圾扔棄或者殺死。為左生存就必須冒上身命危險,聽落何等諷刺。但其實就算係我地現世嘅世界,甚至香港,每分每秒都發生更更諷刺嘅事,只係我地唔知,或者已經見怪不怪。

雖然歷代高達有好多都有細路做主角,但可能因為大多數都著重描寫佢地新人類嘅能力或者係更大嘅世界觀,反而要到鐵血的孤兒我先真正睇到戰爭對兒童嘅影響。一個十幾歲嘅阿哥加入武裝集團,為嘅就係搵錢比自己妹妹讀書;一個被稱為火星老鼠比人賣黎賣去嘅奴隸一直以黎都搵緊同樣被賣左去唔知邊到嘅細佬;仲有個為左一班一早視佢地為兄弟嘅戰友們而起義,再成立鐵華團嘅團長。一切一切你會覺得好似似曾相識,明明睇緊嘅係高達,但係入面你又睇到好多世界真實嘅一面:一班人係一個殘酷嘅世界入面努力生存,每個都有不為人知嘅過去,大家都願意為公義挑戰強權。鐵血的孤兒,我好耐都冇覺得高達作品改嘅名有咁高水準。

佢冇好華麗嘅戰鬥風格、冇好型嘅機設、連高達暫時都係得三部(叫做似高達仲要得三日月果一部),睇開00同SEED果類嘅你可能會好失望。好老實,我到而家到未清楚佢個世界觀,但佢比到一種感覺令我願意每個星期一坐係電腦面前做佢地半個鐘團員,投入果個世界同一班生活係戰亂時代嘅細路一齊面對未知嘅挑戰。好期待,好緊張,好耐冇睇高達會有依種感覺。

一個讚好,是對我的一點支持。
如果想分享給其他朋友的話,請標明出處並附上專頁網址。
http://women.fanpiece.com/moyinday/