小時候,老爸總會一兩年帶我去到「鄉下」一次,探望一下「親戚鄉里」。老爸總會講一句:「你係鶴佬人黎嫁(但用廣東話講,唔係鶴佬潮汕話)。」十多二十年後,我都一直對「鄉下」沒有回憶沒有感覺,又不懂鄉下話。我一直唔明,點解那一個地方會係我鄉下。

我自細覺得我自己的鄉下係青衣,香港國內其中一個小島。民風純樸,最多只有一些街童食煙,連黑社會都不常見。我住的屋邨係一條村,對面第二條居屋邨就是隔類村,但同隔離村的朋友去玩都係很平常的事,要出省城就要搭車過橋才能到,荃灣係我附近的省城,旺角係好遠的隔離市,更不用說港島。正因為青衣係一個島,有好明顯的分隔,我才會好快好早就有這感覺。小學社科教青衣是屬於葵青區,大個後我諗深一層,青衣明明就係自成一區,就算係組成聯合選區,照地理都係同荃灣同區,而唔係葵涌,又或者,組成一個大荃葵青區都係一個合理的方案。當然,心理感覺跟政治考慮是兩回事。

跟許多同事,朋友,女友等討論下,原來每個70、80、90年代的年青人跟我一樣都有差不多的感覺或疑問,大家都覺得某一個地區才是鄉下。我試一試列舉。(如有錯誤,請諒,我都只係轉述,而且有機會記錯。)

深井:朋友話深井根本在荃灣區是自成一區。她的鄉下由嘉頓廠到去麗都花園。其實浪翠都已經係好夾硬算入了深井。

紅磡:火車橋是灰色地帶,其實要落到地面見到漢堡包才是紅磡。黃埔和隔離新的私家樓其實係新區,傳統上紅磡(不包括黃埔)就去到家維邨,或者消防區都算係紅磡,再遠就唔覺係紅磡了。

將軍澳:寶琳景林厚德才是舊將軍澳,但因為多了將軍澳私家樓那一個新區,大將軍澳地區比小時候大了很多。

北角:城市花園到大酒店一條直路都覺得是北角。

第一城:給城門河包住的地方都覺得係馬鞍山。

其他地方我就未有任何朋友可以給我資料或感覺了。不知道如果其他住在如旺角等市區的朋友,心目中的鄉下有沒有邊界?如有人住在我國內地─黃大仙,他會覺得邊界在那裡?九龍城到慈雲山也算?鑽石山算不算?這不是地理,不是政府的分界,而係個人的內心邊界。

你鄉下,係邊?