網絡23條流會,下星期三(16/12/2015)會進行二讀,大家千祈唔可以掉以輕心,要繼續向議員同政府施加壓力,可以宣傳反對23條嘅亦請繼續,因為我見到我有啲 friend 依家先開始講網23。

今次我想主要講下對鍵戰嘅依篇報導
<鍵盤戰線:如有人衝擊會盡快解散集會>
//鍵盤戰線發言人鄺頌晴表示,如果集會時有人衝擊,會盡快解散集會,以免不想衝擊的集會人士受牽連,被問到是否默許衝擊行為,她強調並非默許,而是無權控制他人行為。//

發言報導之後,有人提出係咪搭大台?係咪去到鳩坐等等疑問,我就想講下自己對依番話嘅解讀。

大家可以當我諗多咗或者9UP,甚至覺得膠,一向我都認為唔同人會做唔同野,唔係個個都適合武力抗爭,有啲人真係唔想衝,又或者有啲人未準好就要佢衝,反而會拖後腿。

係有人開始衝撃嘅時候解散集會,其實係可以讓路俾衝撃者,亦都令衝撃者無咗後顧之憂,免去非武力與武力抗爭者混埋一齊俾黑警襲擊依種可能會出現嘅亂局。老實講,大家都應該預咗自己會承擔咩風險,就俾大家各自選擇喇!

到依家為止,集會主辦單位並無講過一定係和平非暴力,無拒絕有可能進行衝擊嘅抗爭者,尊重其他抗爭方式,無話衝就係鬼 。唔會因為其他人用其他方式就鬧人,依個就係真正各有各做,嘗試兼容各方實力。

一個開放式嘅態度可以令今次抗爭無封頂設上限,令人有不確定風險會更容易令對手妥協。

「無權控制他人行為」 依句說話我好同意。
希望今次有行動主辦單位可以容納唔同抗爭方式,可以對香港嘅抗爭做成新嘅開始。
亦希望我唔係諗多咗喇!