由上個月尾宣佈恢復二讀時候開始,大家一直磨刀擦槍,不斷宣傳,希望更多人關注事件,就係等今晚盡地一煲,如箭在弦,不可不發。只不過今日立法會意外流會,搞到大家好似要梗硬將準備出嘅大絕、磨好既利刀,硬生生咁收返,即使再次掀起一番討論:究竟係建制玩手段定依然笨柒?曾鈺成做乜塊面黑過包公?大家應否繼續集會示威?比人感覺有少少自亂陣腳。

老實講,流會對群衆黎講意義真係唔係好大,頂多係叫做比多左時間我地做野,效果同拉布其實差唔多。就連689都知,無論拖幾耐,網絡23條始終都會過。如果大家乜都唔做,又或者只係寄望某幾位議員拉布嘅話,分別都只係早死同遲死。如其哂時間估點解會流會,做乜唔花多D時間拆彈呢?

再者,大家既然都對某D政黨失望,何必寄望佢地係議會裏面有D咩作爲(例如:促成流會)呢?無論班議員做乜都好,某程度其實對個結果幫助不大,再加上班人咁潔身自愛,即使下個禮拜復會都唔會有咩變化,反而保皇黨仲會提高警覺添。呢場硬仗唔係淨係可以靠議會抗爭就得,要動員更多的群衆力量,若下個禮拜輿論仍然停留係拉布定積極討論,都只會係死硬。

雖然流會所產生嘅花生可能真係幾好食,不過既然敵人比多左我地時間,點解唔好好運用呢?各位民間團體,依家既然多左時間,如其只係聯署要求議員提修正案、拉布同投反對票,不妨可以再叫高D價,必要時甚至做番上年十一冇做嘅野,畢竟民間力量並冇直接左右投票嘅能力。另外,我地同時要小心建制同689果邊係依個禮拜又做咩手腳,畢竟佢地動員能力比我地強(雖然手法並不光彩,但成之有效),而最近依幾日政府亦都出黎解畫,相信會有D唔太上網或者唔知咩叫直播打機嘅姨姨信以爲真。

無錯,話唔定保皇黨真係見到咁所以希望我地一鼓作氣,再而衰,三而竭,無錯,我都知勃起唔射會好辛苦,不過即使佢地故意咁做又點?大家反惡法,莫非就只係等依個moment大射特射?咁樣只不過同一個等發洩嘅精蟲冇分別。換個角度諗,呢度火仍然未夠紅,煽風點火就係咁解。

學D大粒佬講,要對準政權,唔好比D花生模糊焦點。