話說,Leo Diamond出一個【磨鍊 讓妳更閃更美】Campaign,幾個女仔,講吓故仔,流幾滴馬尿,企圖感動大家。最緊要睇埋片(https://goo.gl/oUFduP),留言褒貶不一,最多人講的,當然是欣宜(https://goo.gl/kmTd7T)。兩位朋友出Po話「一張哭泣嘅圖片令人聯想不安、傷痛」(https://goo.gl/h68zWJ)、 「梨花帶雨真係唔係咁好睇嫁咋」(https://goo.gl/BswueT),留言話唔明做乜要喊苦喊忽,將軍望望個廣告,其實,本來喊,於廣告不是罪。先講喊,再講呢個廣告。

廣告、推廣,最終目的就是要增加銷量,令固有客戶買多點、令潛在目標顧客開始幫襯,無論硬銷產品、做靚品牌增加好感、增加品牌知名度,最終都是增加銷量為目的,而手法,則不外乎掀動情緒,情感上留下印記、增加喜愛度而轉化消費行為。而情感有好多種,最保險的,就是正向:開心、振奮、可愛、高級貴麗等等,視乎品牌/產品定位,如運動用品,多以剛陽味呈現,賣夢想、努力、奮進、英雄主義;名錶會賣Class、可靠、超然地位;連瑣餐廳會賣家庭樂、良朋歡聚,這些都是正面的。

而因應不同品牌,感動是重要元素,如愛情故事就是用得最多最濫的手法。而喊,在廣告亦屢見不鮮,亦不只聯想到暴力、罪行的,例如將軍最喜愛搞笑得、感動更得的泰國廣告,這裡有七個,當中保險及電訊兩個,早前亦在香港網絡廣傳(https://youtu.be/g6jcJD50X0k);今年Ramandan,巴基斯坦就有間食品公司廣告有男人喊(https://youtu.be/Ad1yI3e4Bkk);馬來西亞稻米廣告,陷家喊(https://youtu.be/fdFVjufexBA);蘋果上年聖誕有一個,又係玩Touching(https://youtu.be/WRsPnzcZ1VY);喊到歇斯底里的又有,這個Condom廣告,必定有效,慎入(https://youtu.be/nojWJ6-XmeQ);香港也有個代表:餅家(https://youtu.be/6rU5V8oUgLw),以哭到幸福為主題,不過高明地避開眼淚。

那今次個廣告出事嗎?整體來說,不算。綜觀留言、讚好、轉發的很多,而且中目標觀眾(我假設為女性、二三字頭),而開Po鬧、話公關災難的,主要是男人。(Ok,這是普篇觀察吧,當然有男的喜愛女的討厭這個廣告/欣宜)真的有朋友說廣告好Touching,真心Like(故撇除打手去研究吧)。

而點解有負評?

一)喊未必個個認為扣連主題
句Tagline重點在於「磨鍊」,予人剛強之感,有人就不喜歡有眼淚出現,而這留言下,就有人回覆,說人之常情。而好多朋友,第一眼就只看到平面廣告,沒有看過片段,就難以感受幾個女角講故事那種感受,另外感動位打折扣。

二)問題不在於喊,而在於喊得唔(夠)靚
喊得靚好難,有導演話女演員如果連喊都靚,就必紅(如張柏芝),但太難太少。

三)整體Creative出事
橋好,都要執行得到。高炒大頭,網上睇無問題,但有人夜媽媽在街見Poster就嚇親,尤其是喊樣;件衫露搏,有人冬天望見都覺得凍;件衫同個地撞色(四個人,兩件黑兩件紫,隻紫同背景太太太近),我明白Brand Guideline隻Colour Tone要跟,但Visual上唔好撞到成Pat野;排版四方、字型細及幼,都令整體美感大打折扣。Copy幾好,算精煉,手機放大睇比較難,建議Printing同Digital設計分開,後者直接將細字放落Caption,Tagline放清點。

四)選欣宜,真的錯?
負評欣宜的,多是男(都是那句,普遍觀察),而讚她努力、叫她加油、睇完堅喊的,多是女生,而正如前文所言,年輕女性 正正是這品牌Target。有人鬧她靠肥姐?女的勾起她孝順;笑她身材?差不多所有香港女生都覺得自己肥,或不滿意自己身材,甚或曾經被嘲笑,而這正正令大家對欣宜有同情心:八卦雜誌、男人笑佢肥,就令她有受害者形象,加個努力不邂的樣子,就更令女性可憐、感同身受。

「You can’t please everyone」廣告中Target(只少很大部份),男人不喜歡嗎?不打緊,不要忘記,珠寶這產品,女仔會買比自己,女仔有主動權;而男仔送比女仔呢,主動權都是女仔:女人最叻一招,就是行街「唔覺意經過」就「望下咋」,在Fb Share吓,好等男人「識做」,就算男人是付鈔那個,他們都是被動的。

男人怕女人喊?

怕廣告喊苦喊忽男人唔Buy?

多女人Buy(或叫男人Buy)就可以了。

而且暫時所見,有正有反有Noise,個Campaign不算災難,條喊橋冇死,最多是執行有誤(對不起,Marketing Interactive 有團隊資料http://goo.gl/zR7UOf)。至於最終Campaign能否帶來更多銷售,翻不翻到數,或到不到內部KPI,就要個Brand自己先知了。