今時今日嘅年青人個個都講追夢,但係成功嘅人,99%以上都係一丈功成萬骨枯,而報章雜誌往往只會報導少數成功嘅例子,即係勵志文。能夠實現夢想嘅人真係少之有少,要有實力之餘,仲要有運氣,人際,機會,所謂嘅天時地利人和。如果人人讀完BBA都可以獨當一面,咁個個都去讀BBA啦,仲駛玩銀行地產?

我絕對支持同鼓勵年青人追夢,最好唔好靠父幹,因為今世係你嘅人生,唔係你老豆老母嘅人生。所以相對我呢個80後都仲追緊夢嘅老野,我覺得年青人追夢嘅毅力同態度都唔夠盡。

身為一個過氣band仔,我以前都係公屋基層出身,當年一架四驅車30蚊,都要幾個月先買得起,靜靜雞買番屋企玩都會俾人鬧。當年組band最少都要四個人,就好似當年我認識好多band一樣,就係搵唔到人。當年最少人玩bass和鼓,呢兩個位置,好難搵到,搵得到都未必玩得好。我同幾個朋友1998年組band,到2003年解散,都從來未識過排到full band,亦無機會上過台表演,當年有youtube,寬頻普及都唔會係咁嘅環境啦。最後我離開原本嗰隊,重組樂隊,同4個當年仲係中五嘅徒弟組隊,成功上到第一次台,但亦係最後一次。

Band仔最希望上台表演,無非都係想多人聽,搏名氣,別無其他。如果你講今日D年青人追夢好傻,我地當年直頭係戇鳩。我地當年每個月只有7千蚊左右人工,租一個300呎工廠單位都要3200蚊一個月。設備萬萬聲起計,當年知道一個現實——就係夢想係需要用錢堆砌。我同隊員差唔多將所有身家都放喺band房裡面,一支咪幾千蚊,一套基本嘅鼓7000零蚊,隔音棉……等等,洗錢好似倒水咁,但呢個就係我地嘅光輝歲月,就算失敗過,回想起嚟,的確係最值得懷念嘅日子。你估玩音樂,搞創作就好似喺表演場合裡面企上台唱首歌咁簡單咩。

人大咗,好多事想做都唔能夠再做,只能懷念嚿屎,如果當年冇盡力,你一定會後悔。當年觀塘係band仔集中地,觀塘廣場經紀一聽到就好積極幫band仔搵單位,當然經常差佬上門係例牌菜,因為就算工廠大廈,入面都有寫字樓,辨工時間玩得太行點都會有人投訴。

當年Visual Rock大行其道,9成band仔都係玩Visual cover,就以當年為例,一層工廈有10個單位,有8間都係band房,7間都係玩Visual Rock同J-rock,當年識咗唔少到過高山劇場表演嘅band仔,佢地就算做到咁樣,都只算係起步,就算有人成功簽約,最後都會因為種種問題,出唔成碟,或者落得一碟收皮嘅下場。

之後跟咗隔離房嘅師傅,成team人都好有台型:粉紅色頭髮嘅鼓手、河川look嘅bass手、jimmy page咁款嘅結他手,我每個星期都到佢地房聽佢地練習。佢地設備好,技術又不錯,仲有經理人幫佢地接job,對我地呢班無根草嚟講,已經係好成功。

夾band除咗學習點樣駕馭樂器,同時都係學習做人。當年一句:“台上band仔,台下爛仔”,你大概知點解,因為當年band仔生活通常都俾當年嘅老野批評為唔檢點,所以都係老土一句:“原諒我這一生不羈放縱愛自由”。街上最嘈吵嘅係我地,講粗口最大聲係我們,幾時輪到波牛同睇波嘅人丫……打邊爐係我地,打交又係我地,借番Eminem嗰句"I am, whatever you say I am",即係而家嘅MK仔,其實起源就係我們當年visual rock開始。

旺角總統,無人不知。冇錢攪band房嘅,都喺呢度玩平房,貼滿牛皮膠紙嘅爛鼓,又爛又殘嘅結他,爛晒聲嘅amp,同埋廿幾呎企5條友嘅房,裡面再煲埋煙,成間731毒氣房咁,就算你唔食,上手煲過煙你入去練一陣你都會成身煙味,就係我當年諗唔到攞埋D風乾火腿入去煙燻,唔係嘅話我一早發咗。你冇去過,就唔好同我講你係band仔,就係因為平,所以旺角通街都係band仔。當年既造型,係基於Glay嘅Jiro、X-Japan嘅Yoshiki、Hide、Luna sea嘅Sugizo等等,但係最後被人玩爛咗,唔係band仔都跟著玩,結果一街都係,變曬MK Look。

以前資源比依家少,大部份都只能靠自學、買書同偷師。得閒嘅就去通利,拆鳩佢d譜,背撚完番屋企寫番低。年青人多數唔識野又周圍串串貢,我地當年都係,最後緊係俾班老屎忽band仔串啦,但其實你點都會學到D嘢。所以年青人唔好成日以為老嘢睇你唔順眼就吊鳩你,其實人地根本冇咁嘅用心,千祈唔好將自己嘅內心投射落人地度,你係方丈,人地未必係。以前有邊個唔係俾人屌大,年青人一向都自以為是,班老屎忽以前都係一樣,但係我地會接受老嘢批評,自我檢討,雖然係俾人鬧,但係起碼人地覺得鬧我地我地都會有進步。追逐夢想,首先就係要打爆自己嘅玻璃心——要捱得、吊得、輸得。

以前要學作曲,的確好難,冇youtube就只能夠乖乖地課金俾老師,但學費又貴到死,所以當年有好多cover band,即係所謂嘅玩口水歌。行內都唔認同呢類band,前輩都講過幾十次,一隊band,如果冇自己嘅主題曲,呢隊band好難出大場面。

我地係大多數失敗嘅例子,原因有無數咁多:就好似隊員搵唔齊、唔識作曲、冇錢養band房、“沉醉於音階她不讚賞,港女呼喝卻永未變樣”。我亦都試過冇工開,仍然要借錢養band房、買設備,到最後真係再借唔到錢,唔放棄唔得,俾業主追數3個月,搞到要傾家蕩產去還債。年青人,你自己能去到咁盡嗎?有錢有關係嘅一定安排好後路,搞唔好就出國繼續學業咁。為咗夢想,你去得唔夠盡就唔係追夢。追夢,錢係必須要散,但係你會換到一堆你一世你都唔能夠再擁有嘅回憶。如果當年我冇做過,我而家寫嘅,一定會係一篇後悔文。

追夢,失敗係必經階段,一次就放棄,或者叫自己階段性勝利,你永遠唔會成功,除非你好運氣、有父幹,好似大多數明星藝人一樣。

90後摘星話比當年難嘅最大原因,其實同上個世紀一樣,即係家人反對。講到呢一點,我明白現在年青人的心理。老豆成日講:“夾band有撚用咩,你做唔做到beyond?全香港只得一隊成功,你得咩?老老實實打份工,儲下錢,買車買樓最實際。” 我而家都會對年青人咁樣講,因為我失敗過無數次,直到今天都仲未真正成功過。當然依家同以前一樣,年青人決定要做嘅事,耶穌都冇面俾。

其實老嘢嘅心態,只係唔想你地重蹈覆轍,因為佢地知道,追夢成功嘅例子,就好似beyond一樣,全香港只能夠有一隊,機會難過中六合彩。但年青人緊係話:“你唔得唔代表我唔得。” 如果你有咁既想法,希望真係做一次,成功俾我睇下,或者衰衰地輸一次,其實兩樣你都會有得著,你都會因此成長。

Beyond最初都係玩地下樂隊,玩heavy metal,最後為咗上地面,都要轉玩pop rock。想講嘅係,就算你成功,你都要作出二次犧牲,邊有咁順丫。

而家,身邊嘅徒弟正走緊我嘅舊路,但係佢地比較好運,有家底,而家可以簽約、出碟、出show。身邊嘅朋友,亦都有簽約唱片公司,成為詞人、作曲人,有時我都不記名咁幫手。我好葡萄佢地,但係老嘢嘅無奈就係現實,老豆老母死咗,再冇依靠,你仲可以用成富身家去亦唔識做波羅雞。

追夢成功嘅人雖然少,但係我身邊總有十個八個,但係星夢亦唔見得有幾美滿。因為一簽約,呢個夢就會變成商業遊戲,公司要你作咩你就要寫咩歌,唔到你話事;公司要你填咩,你都要乖乖地聽話。如果你想繼續玩呢個遊戲,一係你就要委屈求存到你變成天皇巨星,再唔係就要好似當年家駒掉低一句:香港只有娛樂圈,冇樂壇,跟住就走去日本發展。其實海闊天空係寫家驅對香港樂壇有幾失望,跟住放棄,上大台上唱呢首歌嚟講自己永不放棄,你話可笑唔可笑?

追夢係一種心跳回憶,但係追夢必須有期限,過咗就必須回到現實。人總不能成世追夢,幾勁嘅人,都要食飯。