聽日嘅區議會選舉因為白水嘅一篇文一張圖以成為左我FACEBOOK今日最多POST講緊嘅話題,大家嘅爭議無非係投咩派先至啱。有人話一定投本土,冇就寧願投建制都唔投白鴿班仆街,又有人話打死都一定唔拎民賤聯,投下民主派起碼都叫撐香港,當然有人話全部都係仆街,投白票就算數。我明白大家點解會有咁大爭議,因為依家嘅香港你想搵個真心想投佢好難,無論係邊個侯選人背後嘅黨派都做過仆街野,而果班自稱獨立侯選人一係就唔知佢咩料,一係同某啲黨派行得好埋。計我話喺投票依回事當中香港人唔應該再著眼搵一個有幾好嘅侯選人,反而應該睇下邊一個叫冇咁仆街,甚至唔再應該玩依個無聊遊戲。

民賤聯同白鴿黨嘅分別在於一個擺明唔仆街唔做,一個就喺講一套做一套。你問我邊個好啲?其實兩個都係衰,但假如我樓下得兩條友而又係依兩個派別的話,我一定唔會投建制先。建制除左經典四寶之外其實就唔會再為市民著想,特別係香港人重視嘅民主同自由方面,佢地宗旨本來就喺令香港重投中國懷抱。望下乜柒三跑高鐵查特首五千萬之類嘅議案,佢地根本就無視民意,中國想點佢地就點,特首有事唔理乜都死攬。上樑不正,我都唔望做細嘅會有咩突破,入得民建聯嘅又會好得去邊?所以話咩寧願投建制果班我只可以話佢地一喺痴左線一喺無知再唔喺根本就做緊內鬼,民建聯做過咩事值得香港人幫佢?我諗唔到。

至於白鴿,佢地係好假,到現時為止都叫做好似仲識聽下民意。雨傘革命果陣佢地利用緊黃絲帶嘅價值我都唔鍾意,我都睇佢地唔順眼,但對比起戴住藍絲擺明屌柒一班學生嘅建制派,佢地起碼知道要做下樣。因為佢地要做樣,因為佢地要靠大家以為佢地係真民主而投票比佢地,所以當有咩議案要投,佢地通常都識睇住民意做人。但耐唔耐就望到所謂嘅民主派搞內鬨搞分裂,望住某啲元老級突然投共咁然後又離開,望住有啲明明可能阻止到嘅法案突然有人棄權,我真係唔知佢地再扮民主黎做乜,之前跟民意而投嘅其實大多數都係擺明會失敗,佢地就可以做下樣而又唔影響結果咁,依點其實比建制更仆街。真小人同偽君子其實都係衰人,而偽君子更加可以實驚無神插你一刀然後喊哂口咁話「我都唔想咁做」。望住依家嘅白鴿,真係冇當過佢地係自己人。

政治本來就係黑暗,本來就係咁撚假,有幾多個人從政真係為市民發聲?咪就係貪佢人工唔錯。唔係就黎要投票都唔會出現拉下票,跟住平時除左見佢耐唔耐住指啲野影下相話成功爭取之外你唔知佢做緊乜,然後一出黎就話選情告急。如果要我再簡單啲講,建制派係一舊屎,民主派係一舊用膠袋笠住嘅屎,其實佢地嘅核心都係一樣:臭嘅。區議會我有冇諗過投票?其實係冇,因為要我揀一舊好啲嘅屎我真係揀唔出,大不了放左工經過會入去投返張白票。我對係一個失敗嘅政府之下由一堆失敗嘅黨派爭崩頭想選出嘅區選其實冇咩興趣,因為無論我選左邊舊屎都好最後得到嘅都只會係屎。如果香港人想香港有改變唔係應該再喺依個政府嘅制度之下爭取,反而係好似雨傘革命咁樣靠自己。靠議員出聲不如自己出,一條村靠一個人不如靠一村人,政府唔會驚議員,因為議員係政府糧比佢;但政府會怕一班夠團結夠癲嘅香港人,因為香港人係交稅比政府嘅金主。唔洗所有,淨係有雨傘革命嘅人數再同政府玩大佢搞對抗粱振英已經可以腳震,依個先係香港人想改變最應該做嘅事。

一個讚好,是對我的一點支持。
如果想分享給其他朋友的話,請標明出處並附上專頁網址。