近排我已經好少深夜先寫文,更加唔好講而家三點半先落筆。第一次令我有衝動挨眼瞓都要寫文係蘭桂坊港女洋腸、第二次係雨傘革命果排、第三次就係今晚,香港再次打和中國隊。我點幾返到屋企,上FACEBOOK上YOUTUBE將今晚場大戰片段睇完又睇,再沖個涼磨到而家三點半都唔肯瞓,因為我覺得唔寫埋依篇文我會唔舒服。香港隊嘅熱血真係唔講得小,連我都深受感染。
  
雖然我買唔到飛入場,但同一大班企喺場出面嘅香港人一齊睇住場入面大螢幕,睇住慢分幾鐘嘅J2,大家唔怕辛苦,為嘅就係企出黎支持香港隊。先唔好話大家為左乜而企出黎撐港隊先,當港隊成功吸引唔同人過黎為同一隊球隊大叫打氣,大家會為左場比賽肉緊,麥基中框會大叫差啲,對面中框個心離一離,特別係英雄輝二連救果下真係嚇到大家就死咁濟。旺角場外直播為左減輕街燈影響有人爬上去搵膠袋笠住、有人提大家上網有直播仲教埋大家搵LINK、出到街一片紅海大家高叫「WE ARE HONG KONG」,依種感覺同親切感就好似雨傘革命果陣香港人出到黎一條心咁。大家不分你我,目標一致咁支持港隊,連我都忍唔住買左隻撐自己人嘅限量版膠帶錶。我一直覺得錶已經冇乜用,睇時間有電話就夠,特別係膠帶錶真係唔知買黎做,但今晚依二百二蚊我比得好開心,佢比勞力士更加珍貴。
  
睇完波同朋友去食飯,坐低冇耐對面果圍又有個住紅衫嘅阿叔JOIN佢班朋友開飯。冇幾耐新聞播返大戰片段,大家金睛火眼咁望到實一實,當港隊球詐糊重播之際,大家一齊屌左出聲,明明射得咁靚比人話侵犯,真係吹脹。雖然唔識對面班人,但大家一坐低就一齊講返場波,肉緊嘅感覺依然不減。對上一次令到三唔識七嘅香港人可以傾得咁埋,大家好似自己人咁喺幾時?咪又係雨傘革命。上一次一把黃傘一個信念將大部份香港人團結起黎;而今次一隊港隊一個目標又令到香港人再次聚集,邊個話踢波只係運動,今晚嘅香港隊證明左踢波除左喺運動,仲可以係政治,仲有係香港人嘅夢。就算香港技術未到家都好,將士用命,用熱血用意志化解中國隊一個又一個嘅攻勢,踢出一場又一場香港人值得驕傲嘅比賽,身為香港人,點會唔覺得自豪?
  
多謝香港隊嘅每一位球員同職員,你地今晚唔止團結左場上嘅所有球員,更加團結左一班仲有血性同夢想嘅香港人。撐自己人,撐香港隊,今晚所有嘅榮耀,個心已經同港隊連繫住嘅每一位!