男人的浪漫,就係投注站內互相取暖——成班麻甩佬聚埋一齊睇波。

每一個賭徒背後可能都有一段蕩氣迴腸既故事。冇家庭負擔既人,「成份糧毆落去博首期。」,賭波賭馬買六合彩當堂變得好勵志,今個月唔得咪下個月再黎過,波膽位置Q單式複式六合彩乜都得,返工既錢點都冇可能成家立業,倒不如訓身馬會,姻緣同物業靠自己博返黎;有家庭負擔既人,找曬數之後仲有錢剩下,就去馬會博一鋪,搵返餐下午茶嘆下都好。

以前我唔明老豆點解咁鍾意買馬買波,我只記得以前好鍾意老豆去投注站睇波。十八歲,個個人屋企都應該有電腦,但我冇,除左去圖書館借電腦用,就係去網吧,個個人去網吧for打機,我去網吧for睇波,因為馬會只會最盡播到十一點半,佢地一收鋪我老豆就返屋企,而我就會去網吧睇波。

其實我唔習慣去投注站睇波,果頭直情係香港粗口交流既聖地。成班人一齊睇波,一齊屌到飛起,買左大既人屌柒個前鋒點解唔入,買左細既人屌柒個龍冇撚用守唔住,強隊輸俾弱隊就俾人屌踢假波,強隊贏弱隊贏得少就俾人屌垃圾,總之馬會班人乜都屌一餐,如果唔係為左睇波,我認真唔想去投注站。

每次睇完波行返屋企,老豆一支啤酒,我一支可樂,一齊行返屋企,後尾我先發覺,其實老豆睇波純粹為左陪我,為左能夠同我多D話題,而我當時卻冇留意到呢一點。

人行錯一步真係冇得返轉頭,老豆輸到大耳窿上屋,每當我放工返到屋企都見到有差佬,而老豆最後申請左破產,搬走左,但我依然keep住去馬會睇波,好想睇睇波,突然老豆響身後面拍拍我膊頭,同我一齊飲啤酒返屋企。

以前好反感馬會班阿叔成日屌鳩球員,但當我去得多投注站,對佢地既厭惡程度漸漸減退,其實佢地睇波除左激動D同粗口橫飛,好多人都冇乜野,而且熟絡左大家都會有講有笑,一齊睇波一齊吹水。聽耐D,不乏高人高見,更有人講得頭頭是道,令我刮目相看。

投注站內,聚集最多既並非賭徒,而係寂寞既人,渴望靠賭波開心下,渴望同人吹下水,至於贏幾多,輸幾多,此時此刻根本唔係最重要。我漸漸感受到,「同是天涯淪落人,相逢何必曾相識」,有人屋企冇錢裝收費電視,有人屋企住太多人要出街蒲,有人屋企根本孤零零,但共同點係鍾意睇波同賭波,於是大家就聚於馬會內,明明企係度冇櫈坐,明明冇花生冇啤酒,但大家一樣睇得津津有味,成班人三唔識七但係齊齊睇波講波,呢種感覺其實好好,最重要係,呢度冇階級,冇歧視,冇紛爭,大家都為左可以睇場波。

香港地生活,每個人都有各自既難處,尤其草根階級,錢又冇,人又有返咁上下年齡,的確冇咩娛樂,唔賭,人生真係冇曬娛樂,當我們譴責D人爛賭既時候,係咪應該呼籲大家好好關心屋企人,多d關心屋企人,或者佢地就唔會借賭消愁,有屋企人既支持同關心,有時候其實遠勝於贏錢。

每個人都有自己苦衷,其實真正睇通睇透既人,反而係班賭徒,因為唔賭,人會變得好dry,當人生再冇也刺激,咁生同死其實只爭在有冇合埋眼。賭,雖然唔好,但其實只要適可而止,賭,某程度可以成為生活既動力,買個快樂咋嘛,你估邊個唔知十賭九輸咩。

雖然依家有左電腦,我得閒都會去馬會睇波。熟絡左,感覺有人情味好多,睇波仲會搭曬膊頭,份外親切散場後冇多餘既說話,有緣下次再聚,雖然唔算係朋友,但次次見面都會吹下水互相慰問下,我認為,人好多時候只不過需要別人一些關心而已,就已經足夠,唔使話你請我食飯我請返你食飯既。唯一令我感傷既係,我已經冇機會同老豆一齊去馬會睇波睇馬,而佢爭既債務,我都幫唔到幾多,如果可以,我寧願短幾十年命,去換取我地屋企冇發生過任何事情,而我仲可以同老豆一齊佢投注站睇波,一支啤酒,一支可樂,兩仔爺有講有笑。

PS:賭,適可而止,過癮過咪算,唔好沉迷更加唔好重注。