地球不需要人類,而人類卻需要依靠地球為生。起碼到呢一刻都係。地球與人類一樣都係宇宙嘅一部份,都係生命體,先設身處地想一下當一個生命體被另一個生命體侵蝕,霸佔,淘空,摧殘,再自稱為萬物之靈。呢種生命體好明顯就係癌細胞,稱為蝗蟲。

人類就好似癌細胞一樣充斥著地球,如果你相信有造物主,那麼造物主一定同地球有仇,比希特拉更邪惡,竟然製造史上最強生化武器 ─ 人類,然後叫地球用大愛包容一下,今日生多D,聽日再蠶食多D,仲唔係每日一百幾十咁增加添。如果造物主嘅目的就係毀滅地球,咁佢一定時時刻刻掛喺口邊講愛你,因為你係佢嘅左右手,達到目的嘅棋子。

環保係要做,講咗好耐,但係咁多年嚟都係流於治標層面,咩自己環境自己救,就好似你有咗癌症,要食標靶藥一樣。幸運嘅就可以將全部癌細胞殺死,黑仔嘅就只能夠拉長你條命三幾年。環保就好似後者,癌細胞一日未有完全消滅,都係會復發,而復發後因為基因進化,會變得更強大。所以地球一日有人類存在,地球始終會死,環保只係吊命,地球始終會出現地爆。聰明嘅人類應該可以想到善用能源,好似用廚餘嘅油提煉成燃料咁,但係邊個會乖乖咁做丫……咪設定< 京都條約>嚟迫傻仔遵守囉,大台嘅好處嘛,有你講冇人講。

而家人類只係一直做傻事,就好似你同癌細胞話,麻煩你侵蝕慢D,用少D資源,我就死啦,我死,你都會死。癌細胞邊會聽你說,話之你死。某宗教話,人類係某造物主嘅master piece,但係我唔覺得有幾完美。如果你話,人類係造物主最邪惡嘅傑作,肯定冇人反對。可能有人會話,原本人類係喺伊甸園優哉游哉,因為造咗夏娃,夏娃受唔住誘惑犯禁,再將男人拖落水,造物主就火起,覺得人類已經變壞,於是通通趕出伊甸園。

呢個故事更壞,造物主當地球係堆填區?唔完美就掉落地球自生自滅,成為地球表面一大害蟲。戰爭,係人類殘殺人類嘅代表作;宗教,是人類對人類作惡之後當係良心發現嘅低級藉口,而金錢,係人類對人類價值的定位。人有錢就會任性,人無恥就會無敵。

所有壞事,基本上都係由人禍開始。講到呢度,你可能會覺得人類可能比癌細胞更壞,連同類都會陷害。環保嘅目的係咩?九成係要節約能源,減少對地球嘅破壞,但係佢地可能忘記咗,人類生下來就是破壞者,減少破壞即是都仲係有破壞,節約能源,溫水煮蛙,slow cook都係會殺死隻青蛙。你是一個點環保嘅人,你都避唔開破壞,炭排放,你都係要用。除非我地停用資源,否則地球遲早都係死。根據地球年齡比例,地球早死一兩千年對人類壽命來說只是早死一兩天吧,何需大費周章,換來一兩日壽命,講白D就即係"地球唔係喺我有生之年死喺我手上就得啦,呢幾十年地球邁向滅亡嘅速度慢咗就係階段性勝利,俾D掌聲自己"自己有份摧殘地球都仲可以俾掌聲自己都真係幾厚顏,幾自私。

人類對地球嘅損害真係地球上其他生物加埋都唔夠人類一成,恐龍稱霸咗幾億年都唔夠人類喺工業革命後嘅大興土木。要救地球,先要摧毀文明。人類對地球嚟講係毫無用處同益處,正所謂百害而無一利,就好似人類要消滅癌細胞,消滅蠶食人類糧食資源嘅蝗蟲難,如果環保團體知道呢一點,佢地請先收皮,就可以帶頭真正做到完全唔使用地球資源,唔破壞地球,火化後仲可以當肥料用,做肥料好過做癌細胞啦。

如果只係單單做到節約能源,減少破壞就叫成功環保,我勸你早點歸去,咩叫做階段性勝利?不知所謂。