我識列斯聯個陣係2000年,佢地係英超既名牌,熱血既代表,踢法係辣,鬥志係盛,好難唔令人鐘意。

而正係列斯聯,令我明白童話世界係可以親手摧毀,而締造另一個悲慘世界。

以前做細佬哥唔會明白點解列斯聯不停放售我自己心愛既球員,後黎先明原來列斯聯爭人好多錢,唔賣人就要俾人告,俾人逼到破產。

名牌都會執咖咩?以前同列斯friend既公司同集團,一見到列斯有難,個個走都唔走切,但點解列斯會搞成咁,一切都係因為急功近利,想衝出英超,最後搞得自己泥足深陷。

先洗未來錢真係好危險,就好似一個大好青年,前途一片光明,短時間碌爆所有信用卡,錢就使曬,人就happy完,到找數個一刻先知道自己使大咗,但卡數都要找,當min pay都換唔起既時候,唔係申請破產,就係叫老豆老母賣咗層樓去還債。

列斯聯不停賣人,最後連英超席位都保唔住,連列斯聯icon阿倫史密夫都要被賣去死敵曼聯。

十二年時間,列斯聯經濟都唔係咁好,一度降到落英甲,近年先返到英冠作賽,我個人好希望列斯聯升返上英超,但見證過佢地十二年既悲劇,令我明白到,球會發展應該循步漸進,可持續發展先係球會經營必修課。

琴晚睇到新聞,球迷會已經收購咗列斯聯,我個人係悲歡交集,歡既係球會會迎來新既景象,悲既原因出自一種對於未來既恐懼,球迷會接管球會呢類情況我好少聽到,掂唔掂真係唔知,因為都冇乜成功例子參考。

Alex Mowatt

Alex Mowatt

唯一令我有幾份期盼,就係列斯聯呢四件青訓新星,除咗已經上位擔大旗既Alex Mowatt,仲有上位中既Sam Byram 同Charlie Taylor,仲有18歲既Lewis Cook,Alex Mowatt除咗可以踢攻擊中場,仲可以踢翼,得分力頗令人驚喜,Sam Byram可閘可翼係一個非常既材料,Charlie Taylor踢後衛又係有氣有力包抄落力,最有前途應該係Lewis Cook,勝在後生大把世界,又可以踢防中又可以踢攻中,叻仔黎。

Sam Byram

Sam Byram

Charlie Taylor

Charlie Taylor

Lewis Cook

Lewis Cook

列斯聯既青訓不嬲有保證,千禧年個期有阿倫史密夫,基維爾同活基治,之後數落有占士米拿,艾朗連儂等人,最近仲有個戴爾夫(曼城個個),青訓人才不嬲都唔缺,今期主打就係列斯四小虎,希望佢地可以撐起列斯,唔好話升上英超,最起碼能夠喺英冠發展良好,升唔升班其實咪當係bonus lor,不必強求。