如果問你點解香港樓市咁貴,除左答因為炒風之外,唔少人應該都會話因為香港地太少,人太多。香港係咪地少就見仁見智,大過香港嘅地方好多,但細過香港嘅都唔少,但係人太多就係一個不爭事實。作為一個人口密度最高嘅城市之一,千一平方公里就住左七百二十幾萬香港人,係需求大過供應之下自然咩都貴。雖然政府一直自稱搵緊方法解決香港人生活同住屋問題,但有一個好簡單又有效率嘅方法政府一直唔肯做,依個方法就係減少人口。減少人口唔需要人類大減絕咁慘,單單係取消單程證同父母非香港人,就算香港出世都唔會自動成為香港人就已經可以好有效咁減輕香港嘅人口壓力。
  
其實大部份香港人面對緊嘅問題同人口過多係有直接關係:點解樓價高?多人要上車個價自然比人推高;點解租金貴?地就得咁多,人口就係咁升,想做生意自然要比多啲錢。而成本高又好自然轉嫁到消費者身上,最後就搞到物價都升埋;點解失業率高?因為愈多人要搵份工,搵唔到嘅人自然會愈多;點解出街咁多人?除左因為人真係好多之外我諗唔到咩理由。咁人口太多所帶嚟嘅問題應該要點解決?我諗梁特首最鍾意果位五歲小朋友都知減少人口咪得囉。當然減少人口唔係唔生小朋友,話哂人口老化都係香港面對緊嘅另一個問題,但係單單係取消每日一百五十個單程證,一個月就可以少四千五百人,一年就冇左五萬四千人。我一直都唔明點解要批單程證,如果理由係一家團聚嘅麻煩香港果位自己申請返上大陸,一黎又可以再少多個人,二黎大家都話中國強大了,都係時候返去祖國共享榮耀。
  
咁到底香港少左人之後有咩變化?首先要買樓嘅人少左,需求下降,價格好大機會跟住一齊跌,大家唔洗再用係外國買豪宅嘅價錢喺香港買個蝸居。其次少左人同你爭飯食,而面對搵工嘅人少左老闆為左吸引人材就要提高員工福利,到時張廿蚊可能都要改口叫做張五廿蚊或者張六廿蚊。乜話?佢話成本上升生意難做左?你估到時鋪主唔識減租留客?睇黎我真係高估左班老闆嘅智商。好啦,再者就係租金低左,年輕人要創業自然更易,難聽啲講句,就算唔好彩一個仆街衰左都仲有能力起返身。仲有最重要嘅一點係乜?出到旺角行人專用區發現行得舒服左,冇左一堆大媽大大聲咁講懶肉勿演,心情好左,連吸啖氣都清新啲。
  
如果有人敢同我講咁樣會影響到旅遊業的話,麻煩你話我知有咩人鍾意去旅行喺為左同人迫?條街好行左、租金低左、唔同特色鋪頭多左,有邊樣唔係吸引優質旅客嘅好處?唔通你拎哂啲綠化地起樓又會成為旅遊其一個賣點?一班高官口口聲聲話一切為左香港同香港人好,但就連CUT單程證咁有用又咁易做嘅決定都唔敢落,收埋堆一係拎綜援,一係跳大媽舞嘅「人材」返嚟,有春用咩!
  
講講下,我發覺不如真係比個官我做好過啦。