你可以叫我做車迷,亦都可以叫我車狗,點都好,人生冇幾多個十一年,我做咗車迷十一年,唔可以話係專家,但我觀察到既野一定唔會少,起碼多過好多嘩眾取寵既報紙佬,一日到黑喺度老作話摩連奴就快俾人炒魷魚。

我成日都講,人應該有獨立思考既能力,唔好人地講乜你就信乜,正如睇歷史書咁,一字一句全部記曬入腦係冇用,識得將文字消化再建立到自己既睇法,咁先係學 到野,如果跟住大眾既思維同潮流走,最後你只會成為一條徹頭徹尾既跟尾狗,就好似聽到傳聞摩連奴會俾人炒,你連基本動腦筋既權利都放棄埋,加上對車仔既觀察又唔夠,所以你一定覺得呢個傳聞堅過石堅。

談論摩連奴近排既風頭火勢之前,倒不如睇下阿巴莫域治咁多年既變化。

踏入千禧年既車路士,雄心壯志,於是開始先洗未來錢,不停買人,最後成績的確唔錯,但爭落周身債。車路士同列斯聯一樣都係咁,情況猶如一個人爭落好多卡數,還到最後連min pay都找唔起,一係自殺一係申請破產,球會如果申請破產分分鐘就渣都冇埋,同解散冇太多分別,於是唯有開始賣球星,講所有值錢既野都賣曬佢,而車路士之所以冇步列斯聯既後塵,全靠阿巴莫域治化身及時雨宋江,為車仔帶來轉機。阿巴莫域治除咗出錢將車路士私有化,更加出多兩億幾英鎊幫車仔還債同增添球星,所以車路士近十年既成功,如果話係阿巴莫域治居功至偉,也並不為過,如果唔係佢當日既打救,莫講話英超冠軍同歐聯冠軍,仲喺唔喺英超都成問題。

富豪入侵球壇,自然會俾傳媒大肆抹黑,話咩暴發戶擾亂市場,更難聽既說話都有,好多人都覺得阿巴莫域治純粹當車仔係玩具,話唔定邊日玩厭咗就會棄車走人。

然而,傳媒錯曬,阿巴莫域治除咗成條出手闊綽成條水魚咁,同鐘意炒教練,阿巴莫域治經常都會到現場睇車仔既賽事,咁多年都係鐘意捧車仔既賽事,如果佢當車仔係一場生意,佢唔會咁做;如果佢當車仔係一件玩具,咁點會玩足十年都唔厭?十年黎應該拎既冠軍都拎齊曬咁濟,但阿巴莫域治都係成日出現喺史丹福橋球場睇波,從呢d細節就知道阿巴莫域治對車仔係有感情既。

至於摩連奴,當年同阿巴莫域治不歡而散,佢大可以繼續做獎杯獵人,四周圍執教,冇必要食回頭草,大家都知道摩連奴心比天高,點解佢都肯返黎史丹福橋,因為佢都對車仔有感情,而且同阿巴莫域治達成共識,短暫地為車仔拎到冠軍咁好多人都做得到,但要搵到一個人熱愛球隊又甘願為球隊發展作出貢獻,遠遠比拎冠軍更加重要,所以我有理由相信摩連奴既回巢係同阿巴莫域治深思熟慮得出黎既結果,而唔係三分鐘熱度,冇冠軍就走人。

作為車迷,最開心唔再係拎唔拎到冠軍,而係見到車仔正朝住良好既發展方向邁進。車仔由以往既球壇水魚,變成家陣精打細算,由唔多重視青訓,到近年積極培訓幼齒,甚至識得買幼齒返黎培育再放出去賺錢,呢一點其實好值得嘉許,尤其係車路士青年隊上個賽季勇奪歐洲青年聯賽既冠軍,就知道只要肯重視青訓,球會既發展唔一定要靠錢堆砌。

經一事長一智,十幾年時間,阿巴莫域治都應該明白到瘋狂炒教練根本無補於事,瘋狂出錢買人根本冇未來,而佢肯搵摩連奴返黎,某種程度上,佢係希望摩連奴好似曼聯既費sir同阿仙奴既雲加咁,可以喺史丹福橋落地生根,一直教到退休,如果要搵即食幾教練,拎到冠軍就ok,咁佢唔會再搵摩佬啦。

家陣恰逢車仔既重整期,傳媒梗係寫到天花龍鳳,但大家要學識分析,如果冇成績就炒人,阿巴唔會請摩連奴返黎,摩連奴都唔會回巢啦,好多野係相輔相成既,一個巴掌拍唔響,一廂情願冇意思。

身為球迷同讀者,好應該多d動動腦筋,唔好隨波逐流,人云亦云,就算自己分析係錯,都唔好亂執人口水尾。