適逢CASH每年一度嘅Annual Dinner,所有有資格去嘅音樂人全部清一色洗版,老虎蟹都打個卡,話俾你知佢係會員,有歌出街架,呃like之餘,緊係同歌星集下郵,唱番首”姣婆”既"當你見到天上星星,可會想起我"。

CASH香港作曲家及作詞人協會本身究竟做D咩,好多行外人都唔知。CASH好明顯,講錢啦,名都改得夠現實,驚死人唔知佢地係海綿寶寶,最強收錢同吸錢。

幾年前,我喺一個算係公開嘅表演會,發表過作品,之後有人叫我去CASH登記自己嘅原創歌,規則係你首歌在公開場合表演過,有錄影記錄,有場刊證明係你作曲或填詞,就可以登記。我當然冇咁做,二十年前可能會,但係而家有youtube,youku,百度,dailymotion,一切靠網絡,我使撚靠你咩。

登記咗有咩好處呢,而家同你講,其實可以話你知,有等於冇。登記左做CASH會員,有人用過你D歌,CASH會代你收版稅,前提係你要養得佢起。但係CASH唔抽你水,唔係一個收數公司一樣過河濕腳嘅協會的話,你只能夠重新唱一句"當你見到天上星星,可有想起我",仲衰過R人免費影相(我點當嗰45個likes and shares 係錢呢),點都叫互惠互利,只係有幾多係你勞苦功高嘅你唔知姐。版稅即係只要喺卡拉ok,電視台,電台,電影,youtube,廣告等等地方播放或者用你首歌,你就會有錢收,每次都有少少水位之類。聽落好似好吸引,但係你首歌有幾多人用過,天知地知,CASH知,你見到你個銀碼之後或者會知,到每年12月左右你收到版稅後,都會嚇一跳再苦笑。我同同行研究過,報酬都幾有鼓舞性,十零蚊一次左右。佢首歌全年只播過一次,收17.5!當中CASH抽幾多水,唔知,咁大個集團一定唔會少。

而我一直唔想專注一個唔知搞梗乜嘅樂壇,所以我晨早轉投youtube,我15首作品加埋有成十萬Views,一年少少地都有三千蚊版稅,點都好過俾CASH抽完水,再喺手指之間漏番一百幾十俾你。有時候香港獨立音樂人又真係幾冇骨氣,都唔知係唔係飲得生果奶多,俾人恰到上心口,仲心甘命抵去登記,為咗一個保險,你的回報分分鐘不是你的。

當首歌係你一手一腳錄音,作曲,填詞,編曲,放出去sell,CASH係咩都唔會同你做,佢唯一做嘅就係,每年攪個Annual Dinner俾你班音樂人自high一下(你估下收唔收錢呢),因為你地又浪費咗一年俾佢啦,忙到有時間嚟食餐飯social一下,一個集體集郵回憶。其實入面好多一曲走天涯嘅作曲作詞人,幾十年嚟只有一首飲歌,每年得十幾蚊版稅,但係就一定盛裝出席,逢到必早,係集郵界一代宗師,所以……〝出席都需要勇氣,來面對流言蜚語〞。一去到就大撚把菠蘿雞尾行你。一個唔知係你當佢衣食父母,定羊毛出自羊身上嘅協會,有骨氣嘅你點解仲要痴埋去呢?我有手有腳,自己放上youtube應該賺得多過CASH俾你既版稅,會有更多人欣賞到你嘅作品。如果你完全唔當錢係一回事,你就更加唔需要登記做CASH會員,究竟呢班音樂人係圍威喂互相吹捧,定係"今天只有殘留的軀殼,迎接光輝歲月"?。

香港樂壇的華麗背後:http://polymerhk.com/articles/2015/10/21/23173/

呢個係前篇,入面講過嗰班唔係好勁但好有名嘅音樂人,同唱片公司係導致樂壇入行困難嘅主因之外,就係香港個班(大部份)冇骨氣嘅半熟音樂人整死。為咗痴住CASH,為咗一年一度既Annual Dinner,為咗每年唔知有幾多個一百幾十蚊嘅版稅,甘心俾CASH濕腳。我都忽然想起點解呢個情況咁似自由行嘅?為咗要賺多幾個錢,一面鬧人破壞香港經濟,租金變成癲價,但係另一方面零售業又好唔爭氣咁堅持自由行萬歲,局部振興香港經濟,結果零售業獨大,小舖難捱推高過通脹同樓價咪又係下一代受苦。之所以話人係犯賤,樂壇好難唔死。樂壇要開放先會有生機,有多元聲音,你好想香港樂壇好似立法會裡面建制獨大咩?唔好攪咁多咩演藝人協會,作曲作詞人協會嚟抽水,攪多D free style音樂會,幫佢地開下細show開始,咩人都可以玩,雅俗共賞,唔好自己圍爐取暖。現今互聯網發達,你阻止唔到人地憑感覺搵外國歌聽囉,得把口話要保護香港樂壇係冇用嘅。

個CASH Annual Dinner一入到去,個個都係陳方安生,”牙醫”先賺一筆;然後前仆後繼咁爭住走上去同”歪人”,”緣值”兩位填詞界泰斗影相,個個都撚哂官腔話好欣賞你,為你”鐘情”。其實,佢地好嘢又駛鬼你講咩,全香港都知啦。但我真係”唔覺勁”囉,酒杯敲鋼琴,我個心壞透,寫唔出大文豪爆杯境界。

坐咗陣就上菜,有道野生磨姑及黑松露湯。真係唔知係”碟汁稀”定"陳年稀"。之後上個”真.脆魚”柳伴鮑魚。點解冇”豬展”嘅?冇芝心牛丸,糖漬小丸子,又冇”龍小躉”食,叫米芝蓮叫米芝蓮“加星”都唔得。入面音樂人多,偽人更多,可怕過Halloween。同時場內每一個角落都充斥著啪啪聲同臭雞蛋味,因為好多人拍緊馬屁,男神女神巧叻叻。個個係度”林up風”,其他唔出名,入世未深而又唔識擦鞋既,入到去咪又戇鳩鳩坐成晚,睇下人地點擦鞋,點虛偽法。去一次當見識下咩叫上流社會,untouchable,樂壇真係一個除咗講關係都仲係講關係既世界。入面班音樂人,玩音樂唔係major,而係玩擦鞋同埋堆。

老夫唔希罕嗰一百幾十版稅,更加唔希罕一個吹拍逢迎嘅飯局。我只係鐘意專心做音樂,唔係想學點做一個傑出擦鞋仔,我唔會"除外都是一時虛榮","就可自入自出仙境",所以我夠膽講,你夠唔夠膽講呀?