個人認為,講「唔好怕蝕底」依句野本身都唔係壞事,不過就好睇由咩角色講出嚟。

當年發哥講過,拍英雄本色嗰陣,覺得套野會好掂,所以幫手拍咗好多場戲都無收錢,結果發哥一下子就由票房毒藥變咗爆紅,依個就係一個勵志故事。

但係如果角色調換,係吳宇森同發哥講:「你唔好怕蝕底,同我免費拍埋啲戲呀,有你著數架。」 咁成個故事會唔同晒,可能係娛樂版寫住「發哥怒x吳宇森」。

依家就係有好多人同人講「獅子山精神,唔好怕蝕底」嗰陣,無睇下自己係咩角色,當你個角色係「要求」人唔好怕蝕底,仲要老馮咁唔諗住有回報俾返人嘅,依啲叫攞人便宜。

先唔講錢都唔想俾嗰單野,講返個普遍現象。家陣好多老細覺得俾50蚊你,你就要做80蚊野出嚟,香港人嘅工時咪攪到世界聞名囉,而且班老細又唔會唔睇下自己係咪拍緊套英雄本色喎,要人做埋啲無無謂謂嘅垃圾,仲要迫人OT,講「唔好怕蝕底」之前,唔該真係攞塊鏡照照自己先啦。