一張拖住手仔而唔係十指緊扣嘅相,引嚟唔少人嘅遐想,當中當然唔少得「好襯」,「天生一對」。相信唔少人都會認為,藝人感情關我屁事咩,包括我都係咁諗。但點解大家會覺得蕭正楠同黃翠如顯得格格不入,反而洪永城同黃翠如先係一對呢?

呢個就係幻想同現實嘅分別。無論做節目又好,做劇集又好,大氛圍已經營造咗一種洪、黃係一對嘅感覺,大家對佢地有期望,反之,蕭、黃二人出現係螢幕上嘅次數確係少,亦冇營造過佢哋係情侶嘅感覺。

幻想總係美好嘅,現實總係有落差嘅,所以有時候,夢應該醒時就醒。有人話,每個人心中都有一個洪永城(黃翠如),對方點點點,點點點,但係你就唔會鍾意佢,亦都唔會係一齊。

「能成為密友大概總帶著愛」,呢句歌詞相信好深入民心,當大家見到兩個男仔走得埋,都會話佢哋鍾意對方,咁一男一女,又點會從來冇呢種曖昧嘅情愫?

一係你唔知對方鍾意你,一係對方唔知你鍾意佢;一係你唔認,一係佢唔認。於是,每次當你想鼓起勇氣表白嗰時,對方就已經拍拖;到佢失戀嗰陣,可能你又有另一半。總之拖下拖下,突然間發現時間已經過咗好耐,嗰種唔知係咪鍾意嘅感覺,已經淡化成輕煙,隨住歲月洪流東去,一直話畀自己聽:我同佢只係好好、好好嘅朋友。

於是乎,無論往後嘅日子單身又好,結咗婚但對象唔係佢又好,心中總係有個「最佳位置」預留咗畀佢,但你同佢,呢兩條線,永遠唔會有交集成結嘅一日。