喺港豬集體回憶裡面,由梁思浩先生同司徒法正先生嘅靈異節目深入人心,而我對有線新嘅真人show靈異節目,開頭我唔抱太大期望,因為有線怪談都睇咗十幾年,有咩鬼未見過,有咩故未聽過丫。司徒師傅鎮得住鬼又怕鬼,每次見到都例牌金句:佢地唔歡迎我地,快d走,我唔想攪大件事。大佬,靈異靈探節目就是要鬼怪現形為前題,唔係聽你講廣播劇,你見到鬼就叫走人,你個節目拍乜撚呢?莫非法正異聞錄就只係得法正先睇到?所以靈探技窮,要轉型。

有線怪談到後期就變咗所謂異獸戰。你老闆,異獸戰根本係模特兒大賽,表情假不在話下,內容又好明顯係節目安排。垃圾到不得了,所以節目又變陣。今次又即管睇下講d咩。

第一集玩金塔,玩Bloody Mary,長生店玩銀仙。一開始好似幾有睇頭,之後主持再用催眠手法令參賽者驚,名為玩鬼,實為玩人。玩金塔,假嘅,玩參賽者就真。銀仙請唔走,都係假嘅。叫參賽者屙尿驅鬼,係節目中一大笑料。Bloody Mary一節係最悶嘅,因為洋人玩意,信則有,不信則冇,就算係,Mary最多只算係吸血彊屍,或者吹氣公仔。

呢個節目唯一要讚嘅係,佢真係證明呢個世界根本冇鬼,屎忽鬼例外。現場冇師傅,只有心理學家。頭兩集都用好多催眠手法嚇參賽者,證明,人意志唔堅定係好易被動搖,係好容易被催眠而信有鬼神。就算冇真鬼,假鬼都可以透過心魔造出嚟。參賽者好有勇氣,先唔講鬼神。要喺街食拜神食物,喺殯儀館一路行,一路叫自己個名都要好大勇氣。因為,街外人都以為你係"精神領袖",傻仔。你必須要做到大明星一樣,旁若無人。加上節目入面並唔係所有參賽者都係素人,話就話係召募,大家睇有線咁多年都知有線D慣常手法,邊會真係召募丫。請著一班唔驚鬼嘅人,又或者基督徒,成個節目就仆街架啦。所以一定係自己人,但係好睇嘅地方係,佢地以為自己上黎玩鬼,原來係俾有線玩仲要對玩你嘅人表達感恩,"一個甘去為上鏡蹈火海的人"。你當整蠱節目睇,當堂好笑到震,娛樂性絕對高過100毛。

我自問天不怕地不怕,鬼都見過不少次,但我一直堅持眼看未為真,所以我一直都唔相信。如果有利益袋袋,你叫我玩,分享下都冇咩問題,而節目中嘅催眠手法,經常係用"主持會講"
1.通常有事都唔係即時
2.會連累家人
3.你番到屋企過幾日死咗點算

如果咁都催眠唔到你,梁生,導演都會出黎。製造個羊群心理,仲唔得的話,就叫埋心理學家出黎,你當堂就軟晒,就好似你搵個基督徒出嚟認有鬼,你一定信架。

以上三點帶間接恐嚇成份既催眠,唔好話鬼神,普通人同你講,你都疑神疑鬼啦下話,何況仲要係嚇一班入世未深既細路仔添。你同我講,我真係怕你條脷有毛咩,有種你咪請囉,請一個虛無既死人點同活人鬥。真正嚇你嘅,係你自己嘅心魔同身邊既所謂朋友。

其實鬼神嘅可怕之處係在於,佢係無形,以故事形式來存在。如果你唔知道高街嘅故事,你只會當佢係爛屋,然後叫城規會重建,你估利東街咩。如果你冇宗教羈絆,你就不會怕地獄。冇宗教,冇儀式,錢就難賺啦。

宗教,不礙乎錢,人心,權力。宗教就係要你怕。你唔怕地獄,邊個擁護獨一神?你唔信因果,又點會有佛祖金身?所以觀自在,人心。