唔知而家嘅學生仲有冇寫紀念冊依回事,因為科技實在太方便,加個FACEBOOK就可以隨時睇到人地嘅動態。但紀念冊最特別嘅地方,就係在於可以畀大家用仍然係一班最熟悉嘅同學嘅身份,去寫出到你最真實嘅感覺,依種功能FACEBOOK有排都冇可能取代到。雖然你可能會問「寫左又有幾可會睇?」,但有時就係唔覺意咁搵返出黎,睇返果下先有一種回憶嘅感覺。

如果唔係我要換張書檯我都唔會執哂所有嘢出黎,亦都唔會搵到依本已經封哂塵嘅小學紀念冊。其實紀念冊我有兩本,我都唔係好明自己點解要比兩本紀念冊同一班同學去寫,但剛才打開望返,好多個本來已經冇乜印象嘅名又記返起黎。我最鍾意睇嘅係最後一項嘅心底話,睇住個個同學喺度寫低對我嘅感覺,叫我唔好唔記得佢、第日結婚記得請佢去飲、叫我唔好再做隻水母(冇錯,我小學花名係叫水母,但我都唔記得點解),真係有一種好懷念嘅感覺。望住好多女仔用唔同顏色嘅原子色筆去寫,油埋顏色,仲要畫埋隻水母出黎寫到靚一靚,又望到有個男同學原來自細就想做個變態佬,興趣係做愛,最後畫左個應該係女人嘅裸體出黎,其實當中包含嘅感情比而家用緊嘅FACEBOOK要好好多。

寫紀念冊依個行為我只係做過一次,中學已經冇人再做依樣野。加上我最後果年係全男班,大家最後一日都係影張相講幾句粗口就算數。唯一比較慶幸嘅係中學果陣興死亡筆記而我又買左一本返黎玩,大家都好比心機咁係果本殺唔死人嘅筆記上面寫住啲老師同學點樣慘死法,我諗再過多排拎返出黎望都應該仲有排笑。

科技進步係件好事,但人情味同友情依啲感覺科技永遠都比唔到我。睇住FACEBOOK上面嘅野都唔及我睇返紀念冊上面嘅咁大感觸,因為FACEBOOK你只係睇到大家最近嘅生活近況,但係紀念冊上面所寫嘅一切,都係嗰一位同學對你最真摯感情,只係屬於你同佢之間嘅記憶。