開始我今日個題目前,我戴番頂頭盔先。以下內容純屬一己之見,唔等於作者原意。

平時我鍾意think twice,即係一件事最少從3個方向分析過先講出口(粗口例外,粗口當然要first strike啦),睇小說睇戲睇完一次之後最少思考多三兩次,搵下undertone先叫睇過套戲,你估我係啲純打卡港豬又或者啲收咗錢嘅所謂濕鳩影評人咩。最近有個教友同我講,教會個牧師最近買齊成套<哈利波特>,同埋一部50吋LED大電視,邀請我一齊返去溫故知新。當時我陰陰笑緊,不過睇在一場朋友份上,我買齊紅白酒,佐酒小食(成年團契嘅福利),用最relax嘅方法去佔領導讀室,搭個大台打邊爐overcook就唔好啦。

《哈利波特》其實係一本推廣巫術嘅書籍,巫婆(Witch)喺基督教歷史裡面一直係反派,相信大家都知道獵巫(Witch-craft)事件,如果將呢個概念結合去over-read<哈利波特>一書,你會發現,跟據獵巫事件呢個舖排,喺基督教眼中哈利波特等魔法師先係反派,玩掃把仲唔係?香港掃街嘅哥哥姐姐死得啦。對於一個慣用多角度分析嘅我當然唔會覺得「多倫布」,唔係,係哥倫布發現新大陸之後俾啲掌聲自己至啱,講到尾電影版係由華納兄弟製作同發行,咁大間公司一定面面都顧及到。對於我嚟講,飲酒食花生睇妙麗同張秋先係我重點,套戲同試音響對我嚟講本來就係格肋底毛,可有可無。

以下開始用逆向觀點睇《哈利波特》:

「德思禮夫婦」

第一句對白就係:我地係非常規矩嘅和理非非,我地唔相信邪門歪道!明顯一對耶膠,討厭魔法同超自然嘅人,亦很在意人地點睇自己,光環點都要戴穩。佢地好怕人地知道自己同波特家族的關係,當然,有邊一個基督徒唔係服從主嘅權柄,挑戰權威呢?

「看地圖的貓」- 麥格教授

貓,一直被視為係巫師的跑腿,魔鬼嘅化身。而古埃及有貝斯特貓神,係個貓頭女人身體嘅神。貓喺獵巫期間被基督教視為非基督教神靈嘅象徵,既然貓係古埃及神明,就係異邦神,係邪魔化身

「哈利」
絕對有機會會被推演為"Lucas"。點解會咁講?既然為出名魔法師一族,出名巫女之後,加埋佢學魔法嘅天份,真的走不了,更何況佢額頭個閃電符號呢……

「哈利額頭嘅閃電」

路加福音 第十章十八節,耶穌對他們說:我曾看見撒旦從天上墜落,像閃電一樣。 瑪麗蓮·曼森(Marilyn Manson)在Antichrist Superstar中也用了閃電作為LOGO,一個被稱為「教主」嘅「撒旦教」殿堂歌手咁強調閃電,你明嘅。

「一群披著斗篷的人」

一睇到呢幕,我即刻想到,呢一幕同撒旦教嘅祟拜儀式,服裝差無幾。就算唔係撒旦教,亦絕唔會係基督教。喺基督教眼中,稱得為異教徒,亦即係邪教啦,當年喺羅馬係是要處死的,你睇下達爾文同伽里略。

「麻瓜」

麻瓜,其實係指崇尚撒旦教,但未入撒旦教嘅人士,靈魂未賣給魔鬼嘅人。喺基督教眼中,巫師係拜魔鬼嘅人。

「貓頭鷹」

貓頭鷹能在黑暗中找到光明,係夜間活動嘅動物,亦即係曾經代表光明嘅天使露西法,即故事中哈利坐上貓頭鷹去找露西法!而故事一開始已經講一大群貓頭鷹喺白天活動,有機會暗示,露西法大軍,要準備佔領上帝嘅白天了。

「鳳凰會」

火鳳凰需要浴火重生,鳳凰會就係要毀滅現有的社會而重新建設,正正係「新世界秩序」。

「佛地魔」
一個喺故事入面最邪惡嘅角色,一直想殺哈利,但係一直殺唔死。我解讀佛地魔為獵巫之人但又消滅唔到。不過我地要諗一諗邊個最想撒旦死?

啱啱同一班舊教友過咗個「輕談淺酌星期六」,6男6女飲咗成13枝酒,下晝喺教會睇一集,夜晚大家真係打完邊爐之後去齊鐘一個弟兄間丁屋睇多一集,差D趕唔到尾班車走添,我地約定咗下星期六再約一次再煲戲,好好煙酒煙酒,有咩發現再出文分享。