同好多上莊做嘅嘢,讀大學做嘅嘢一樣,咩嗌莊dem beat係幾乎徹底地無意義而on9的。但其實無意義同on9就正正係嗰個意義。正如世界各地軍訓要你摺到張被起角,正如香港消防餵新人個屎眼食蛋糕,就係無嘢搞搞鳩你囉,點吖,吓?

個說法通常都係話要消滅過剩係自我意識,等你知道個體(即係你)係完全無價值同無意義嘅,而整個組織(及掌權嘅仆街)先係絕對嘅。我其實認同人係要keep your ego in check,但對於哩類為做而做,同埋必定引發路西法效應嘅做法我非常有保留。

不如去掃下地執下垃圾洗下碗洗下廁所派下飯好過啦。

我上莊嗰陣都咁架啦,傳統吖嘛,係咁架啦。展示誠意吖嘛尊重吖嘛。咁樣就合理化咗好多on9嘢,即使啲嘢係違反常識,違反正常社會契約什至基本禮貌基本對人嘅尊重。好似國王的新衣咁,一開頭明明個撚個都睇到係無著衫嘅但無人敢出聲,如果唔係好彩有個死𡃁仔問國王你做咩咁on9,個個都會腦內補完最後變到真係相信國王有著衫。

不過又即使係咁,我都覺得因為香港無得當兵又無國民教育又做親義工都有專人服待,其實嗌莊dem beat係可以做下嘅--好小事啫比起用屎眼食蛋糕--如果係on9當有趣嘅話。你知道件事係on9嘅,但都頂硬上照做,做之餘重識笑重引埋隔離嗰個識一齊笑,其實係好有用嘅心態。而一個團隊一齊on9當有趣過係會強壯又係真嘅。

但如果on9到真心以為啲on9嘢同你嘅乜撚嘢熱誠態度尊重或者任何嘢有任何關係嘅話,咁就大撚鑊喇。一係蠢到無藥醫一係痴撚咗線,無架喇。

另外有嘢大學術語想講好耐,"com"。如果厭communicate太長其實點解唔可以用個"傾"字呢, 一樣一個音節,而且唔會有人聽唔明㖭。同埋無啦啦做咩要用隻英文字,又唔係咩外來嘅嘢或者槪念,廣東話無字可以用。但其實都無所謂,我血唔係藍色,即使聽到人講van仔唔咬唇或者drop note屎都唔怕會有過敏反應唔舒服。而係我認我心邪我成日都聽咗做"哩個我未同我啲莊員cum過,要cum完先答到你","哦咁你哋cum晒先啦",極之令人分心。

題為編輯另擬