最近我係網上同人鬧得好勁嘅題目,就係呢單嘢。我從來唔會質疑IU嘅唱功,佢嘅誠意,佢嘅努力。撇開宗教信仰問題, IU學廣東歌覺對有誠意同俾心機,因為廣東話基本上係比較難駕馭嘅一方之言,比起韓文發音複雜好多。我只係批評編輯點會用發音準確嚟表達同讚賞。從任何一個角度睇,就算本土港豬都唔會個個讀得準,甚至比大陸人講廣東話更差。可能係我耳仔有問題,可能大家有泡菜情意結,我唔知道,我只係以事論事。

講到廣東話發音,冇人唔知係源於象形文字,不同韓文,日文,英文係拼音文字系統。相信IU一定係以拼音方法背廣東話歌詞,所以,邊有可能準呢?廣東話唔能夠單睇一串拼音就知道呢個係咩字,正正係廣東話獨特與難學嘅地方。就算喺香港生活咗幾十年嘅河國榮,我都唔敢講佢100%字正腔圓。港豬自己好多音都讀錯,例如:橙,產,五,國,角,我,牛等等懶音橫飛。香港人自己都讀唔準,一個韓國人死背都係似,又點會字正腔圓同非常準確呢?究竟話佢發音準確嗰班編輯,係唔係用廣東話拼音讀廣東話呢。

同我理性討論嘅嗰班人之後提出第二個老問題:「你有資格批嗎?」。我與網民討論期間,普遍嗆聲問: 「不如你唱一次韓文歌啦DLLM」之類。講得出呢句說話即係代表你幼稚。俾comment嘅人一定要勁過被comment嘅人先能夠俾comment?仆街啦。照佢地嘅理論推演落去,音樂比賽係唔係評判一定叻過選手?即係李雲迪其實都唔係好一般,班評判應該彈琴最勁。蕭邦大獎唔使再攪架啦,最勁嘅人一早就死咗,最勁嘅一定係蕭邦。

喺字幕幫助下我當然知IU佢唱乜,知道佢120%俾心機賦予呢首歌第二生命,唔似某啲中港台歌手,你唔睇字幕都唔知佢唱乜。但唔代表叫做發音準確。歌迷只會講:呢啲係佢嘅獨特唱腔,你知條鐵咩,即係呢位歌迷原來係大演唱家,失敬失敬,我都要"莖候佳陰"。唔使笑,我係特登打錯字,因為港豬普遍語文水平真係參差咗好多,連"矢言"都唔知點解。

韓國歌手同香港歌手唔同嘅地方係,佢地細細個就接受唱歌跳舞訓練,參照我之前寫天才訓練嗰篇文嚟講,唱得好係正常不過嘅事。身為歌手,幾時都應該唱得好。香港新派歌手唔同,好多都係半途出家,做緊model,學生,打工仔一下就彈出嚟話出碟,做歌手。譜唔知識唔識睇,咪唔知識唔識用,廣東話發音唔知有冇執過,有啲只係識得廣東話拼音就開始唱廣東歌。香港呢幾十年只係出過幾個例外,就係仙度拉,葉蒨文同衛蘭衛詩兩姊妹。

IU唱歌技巧唔錯,賣點係三段跳音,韓國新一輩女聲嚟講佢雖然唔及Davichi,Ailee,Taeyeon,Hyorin等人,但喺香港已經有咁多人叫好,可想而知,點解香港人咁迷外國歌,相反就好似未聽過Sunday靚聲王一樣。

韓國人嚟講佢算係唱得字正腔圓,但係咩叫香港標準,我建議你睇下中文大學何文匯教授既廣東話著作,學好啲廣話先一齊交流,我唔會質疑你有冇資格,只需要你有基本認知。

Wyman本身都好重視廣東話發音,錄音嘅時候,佢成日都話啲歌星發音錯。佢都冇講IU發音有問題,淨係好避重就輕咁打交道式話:有品味,背誦好難。你send首佢嘅作品俾佢,問佢好唔好,唔通佢同你講,好難聽咩。

有啲嘢,啱就係啱,錯就係錯,唔係話因為佢係韓國人,讀唔正都叫讀得好。呢啲叫虛偽盲目。就好似你同鬼佬講英文,你用港式英文發音,我唔信個鬼會讚你發音正確,但係佢絕對會好俾心機去聆聽你講咩,令你產生錯覺,認為洋物永遠係最好的。

學某班人話齋,捍衛廣東話高潮已過,就憑一班自己都讀唔正廣東話,成日寫中文錯別/白字嘅本土人士去保衛?何其笑話。