近日係 am730 讀到一篇關於李寧先生嘅訪問李寧 成為香港人後首談中港矛盾,文中提及當年愛國嘅體操王子通過 「優才計劃」移民香港,文中最惹人注目就係李生認為香港要去殖化,以下係節錄文中李生對去殖化嘅觀點:

「但是說香港與中國對立,是滑稽中的滑稽,有甚麼必要!」接著他解釋提出去殖化的底蘊,就是提醒別被殖民思想導致情緒化,地域間出現文化差異很正常,縱使難以接受內地人一些不文明行為。

似乎李生認為香港去殖化就可以化解中港對立,不過本人觀點係倒轉,大陸要抺去香港歷史,咁只會令香港人更憎大陸,而依個殖民歷史,其實就係令李寧先生移民香港嘅原因。

回帶睇返依個當年咁愛國,08年喎陣都幾廿歲人仲拿住個火把吊晒威也去點奧運聖火嘅人,做咩要移民香港呢?睇返當時嘅訪問

李寧為孩子移民香港 無大願望隻願孩子健康成長

「 2006年通過輸入人才計劃定居香港。李寧說,到香港定居前,他和家人一直住在北京,但眼見孩子慢慢長大,要上學讀書,他就希望讓孩子到香港讀書,因為他認為香港有特殊的歷史背景,中西文化交會,學習環境比較好。」李生講嘅特殊的歷史背景—咪就係殖民囉,依家你啲仔女因為依個歷史而受到良好教育,著數攞咗就要抹去依個歷史,我都唔知依啲叫過橋抽板定忘本好喇。

到am730文章未段,李生解釋做咩當年要係香港上市:「他坦言當年是內地不給予機會,皆因不像今天般開放。」

即係香港俾機會你喇,唔只俾機會你上市,仲俾機會你移民同俾你啲仔女係香港讀書呀,俾咁多機會你,你又為香港做過啲咩呀?不如等我講下你間「李寧」係香港上市做過啲咩喇。

李寧04年係香港上年,之後幾年每年都有雙位數字增長(包括營業額同盈利),李生更被譽為退休運動員奇跡云云,直到08年奧運後,有人開始擔心大陸嘅體育用品公司會因為奧運嗰期推出太多貨而出現存貨過剩問題,點知李寧係09年業績公佈都仲有25%增長。

嗰陣好多財經專家/大行都走出嚟唱李寧勁呀,過咗金融海嘯同奧運都仲保持增長,點知到咗10年尾嘅訂貨會(每季嘅訂貨會係大陸上市體育公司主要收入來源)就突然出現0增長,有啲貨仲出現倒退。咁突然係咪偶然呢?其實背後發生過咩事呢?

係度要解釋下李寧嘅運作,亦都係大部分大陸上市體育用品嘅運作。

體育公司嘅銷售會將大部分貨賣俾分銷商,而唔係自己做門市直接賣俾用家,即係好似毒犯會將啲貨賣俾拆家,而唔係直接賣俾道友:

體育公司—〉拆家(分銷商)—〉用家

以會計制度嚟講,體育公司一賣貨俾個拆家就可以入賬話賺咗錢,如果有段時間體育公司想谷銷量,佢地唔洗諗啲咩減價/改善質素去吸引用家,只要谷個拆家受咗啲貨就可以。

咁大家跟住就會問,啲拆家傻架咩,做咩要係咁幫人坐貨?咁係咪咁多拆家都傻咗坐咁多貨呢?不如推後少少睇下,係11年嘅時候, 體育公司大量購回分銷商嘅「賣剩蔗」,咁到底係咁多分銷商一齊傻咗去坐貨,定係一早暗瓦底知道有咁大隻蛤乸隨街跳,啲貨賣唔晒會有人收返先入咁多貨呢?

咁將壞業績推遲有咩用呢?如果俾著我明知自己公司唔掂,不過街外嘅投資者要一大段時間之後先會知,依段時間我又可以做啲咩呢?咁橋10年頭李寧嘅股價就見頂下滑,係咪有春江鴨就大家自行判斷喇,而李寧依單野係貢獻緊香港定係利用香港股市搵人笨柒,大家都心中有數吧。打後幾年李寧嘅業績都受存貨問題影響而倒退,甚至出現蝕錢,當年買咗李寧股票嘅人就有排坐喇。

李生呀,依家係香港俾機會你,你就係香港攪啲咁野過香港一幢,香港金融業係有信譽架。你嚟到香港,又話要將香港歷史抹走,你有咩資格做香港人呀?仲要由你去判定咩先叫香港人

「香港人都不承認自己是中國人的話,他們根本不是香港人。」 (am730 文中)

你憑咩呀?
(本文非任何投資意見)