自小學D煩膠功課開始,作文題目總會有問下我有咩興趣同理想。理想係咩?我嘅答案當然唔係"我的驕傲",而係就算我有冇錢,我都樂意用我餘生去履行嘅目標,就好似D音符,即使香港樂壇唔鍾意我,我都會繼續創作一樣。

如今大家有咩運動都講"毋忘初衷"——運動失敗要"毋忘初衷",每年哀悼要"毋忘初衷",究竟,醫生又有冇初衷呢?好多人會認為醫生背後都有一個好偉大嘅理想,就係無私救人,不論或貧或富、有罪無罪、親疏仇敵,呢個應該就係醫生們嘅初衷,甚至係醫生嘅基本精神。但係我地今日見到嘅,某程度上係一班為名利而活嘅醫生,我都想問一句:冇人工,又或者人工得兩三萬,你仲做唔做醫生?如果邊個醫生答唔會,邊個醫生就只係為錢而做嘅醫生,咁嘅話就唔好再講咩偉大理想、救急扶危之類。如果覺得人工低就要靜坐抗議又或者按章工作,呢種係背棄醫生精神嘅行為;真心為病人而活嘅醫生,鳳毛麟角,為錢而活就彼彼皆是。或者呢一種係你對金錢,對人性嘅一種無忘初衷,果然係"背棄了理想,誰人都可以"。

港豬把口係無撚敵,絕對攞得"米豬蓮",因為講"扮含冤"、"吹水無極限"、"奶鞋底"同"抽人水就橄欖啜核,俾人抽水就死死實實",港豬當之無愧;但係當你講到錢,俾著數,而個數目又超越底線,港豬就會"兇相便呈現"。醫生會講,佢地辛苦,壓力大,on9……吖唔係,係on-call 36小時等等。試問香港幾多打工仔唔駛超時,要日以繼夜咁工作?有幾多人超時但又無補水補假?有邊個打工唔辛苦?你問過你屋企嘅"無法可修飾的一對手"未?唔好以為讀多幾年書就高人一等,有醫德嘅醫生應該都聽過同埋做到生命係平等依個道理。見工經典問題,點解你值呢個價?

如果你嘅理想係要成為一個有愛心,受人敬重嘅醫生,冇人工,無國界醫生呢啲你一定會常駐幫手。使命崇高大於一切,咁又何須塑造金身供人敬拜呢?唔跟足加薪就嚟個靜坐抗議,實在有損世人對醫生這個職業的尊敬。其實最受人尊敬嘅係嗰班義診嘅醫生——無國界醫生,因爲佢地真係做到。就算唔係常駐,一得閒就去投身義務,先係"毋忘初衷"。

香港人經常話警察只係打份工,醫生何嘗唔係為人工,無陰功?偽善,即口裡說不,身體卻很誠實。說話講得有幾動聽,點為病人服務,到頭來人工加得唔夠公務員多就發爛渣,變咗"Angry Jerk"……sorry,係Angry bird。咁公務員見到私人公司十九幾個月糧係唔係又要嬲嬲豬?

香港始終係好現實嘅資本主義社會,講錢、講面、講名氣,你為錢而活,無可厚非。但係你真係咁等錢使就唔該你自立門戶出去掛牌,又或者加入醫療機構啦。醫生每月收入六萬起跳,估問醫生就更加唔駛講,但係把口就話萬般帶不走。錢有邊個覺得夠用呢?我鍾意收得我貴,但係使命必達嘅醫生。你要清高,就要犧牲,邊有"又要馬兒好,又要馬兒唔食草"咩,唔好搞爛gag話"寶馬"呀。

今次醫生靜坐,我都係送一句泛民金句俾你: 毋忘初衷呀。