最近我又參加咗由大唱片公司,環球攪嘅「粵唱愈響填詞比賽」,心諗,大公司喎,唔會又玩不了了之呢招濕鳩下話。點知比賽完咗成四個月,先聽到朋友話環球九月尾靜雞雞喺自己網頁出個post仔話阿邊個贏咗。得獎嗰份詞係點?唔知,有幾多個人知?唔知,真係咩都扮到不了了之。

我大大話話參加過香港大小音樂比賽超過三十次,當中最少有七成係不了了之,即係,唔公佈結果,唔頒獎,等事件淡化,大家當冇發生過一樣。當中有係有好多黑暗嘅原因。你一定會諗,細比賽,細公司,可能先會。咁你就錯,九成係大公司發生。

首先,各大唱片公司入面有啲咩人呢?一定有幾個唔係好勁,但好出名,上晒神台嘅音樂神棍。點解叫神棍呢,呢班人就好似摩西枝棍咁,唔知係神定摩西分紅海,但係摩西枝棍就俾人讚到上天。當中最出名一定係「完殖佛能」,同名符其實嘅「五六成」,佢地直頭將呢一招神技玩到化境。

佢地會收學生,一定係收足學費。教完文學理論,當教咗你,因為創意係冇得教嘅。之後老師就會叫唱片公司過啲 demo,叫學生填詞。填得好,就自己改幾粒字,或者某部份老師改都唔改,就用自己個名賣比唱片公司。賺到錢都唔會俾你,你?紅過無名英雄囉,比OEM仲慘。所以有時你會聽到港豬話:屌,你都唔出名,勁極有限啦。呢啲情況係有苦自己知,我幫過邊個填過詞,作過曲,冇名出,你鳩知咩。港豬睇野好表面,亦好天真咁相信唱片公司打出嚟嘅人名。內行人都知,真係佢作咩,屌。

「佛能」,「五六成」等人,一直賣學生作品賺錢,當某日良心發現,就叫唱片公司開比賽,例如歌唱比賽,作曲比賽,填詞比賽等等……其實只係巧立名目,用比賽嚟捧自己徒弟上位。當然,無論幾差,佢都一定係冠軍,或者入圍嘅,九成人係自己友,邊個贏,都係佢徒弟,無得輸。其他無背景嘅素人,只係陪跑,又或者好好彩,攞個第三。有次更過份,因為某人徒弟遲遲未交歌,為咗佢,成個比賽延期,幾撚公平!最後當然不負所望,某人徒弟冠軍啦當然。

第二個原因,當然係推廣手法,成個推廣做完,發覺冇成效,推唔起林子祥首歌。蝕撚咗,仲點會派獎俾你呢,樂壇係黑暗嘅,一切都係向錢看。當你俾demo唱片公司聽,佢會問你,我憑咩買你隻歌,蝕錢生意點同你做?你又唔夠「抄仲得」出名,又唔夠「吳肉機」後台多。

唱片公司其實係唔會點聽你首歌,只係睇人名。比賽亦一樣,試過同某出名詞人合作,真係易贏好多。人地見到作曲「占米糕」,就即時就掉落資源回收,但睇到「中情局」填詞,編曲"Johnny Walker",即刻就頂頭大熱。樂壇就係一個咁嘅遊戲。

呢個比賽有好多新手不滿,當中有人話:以前華X唱片公司曾經搞過一個填詞比賽,最後都只淪為一個Marketing的谷宣傳event。我相信環球絕對唔會隨便糟蹋大家的心血,right?呢位朋友入世未深,誤信唱片公司。以為真係會買賣你嘅夢想,係唱片公司眼中,冇名氣,就唔值錢,衰過濕水廢紙。

前幾日有人問我,點解以前d詞人填得咁好,作曲咁好,而家咁差?答案得一個,全部都係某學校出嚟,某幾條友嘅徒弟。有咩辦法好得過師傅先得架。師傅未死,好野都唔會俾你出到街。況且,溫室栽培係好,但係好似人蔘呢家嘢,野生當然好過人工培植啦。

令呢個樂壇死嘅,一定係一班無眼光,無遠見嘅唱片公司同上咗神台嘅創作人,攪到今時今日個市場萎縮到咁撚樣,係抵撚死,係「不該」。咁都唔死就無天理啦。如果你仍然覺得有希望,想加入樂壇,首先,你要好有錢,自己搵編曲,搵明星唱。第二,要有關係,超級靠山,同埋第三,要有金槍手幫你寫歌。我寫到歌我寧願上youtube賺view賺like好過。

三樣都無,就好似我咁,酒杯敲鋼琴,你個口爛臭囉。

咪亂對號入座呀。