偽文青大把人講過,定義都有好多,但係綜合嚟講都不外乎外表裝扮,行為舉止,功利啲講,有咩文章未講過?事實上,喺香港,真文青反而唔多。

真正嘅文青係雅俗共嘗——粗口歌、甜故、風流韻事,無一不知,無一不精.佢地唔係單純地傷春悲秋,因為蒸魚唔記得落鼓油就寫篇潮文嚟傷春悲秋,感嘆魚熟嘅時候同愛人分手一樣,骨肉分離;古有草船借箭,今有潮文呃like。寫潮文要有內涵、有視野,就必須要有經歷,不在乎天長地久,只在乎有料喺手。你未親眼見過神,你又點能夠做證話真係有神存在?所以我都好想搵到神填滿我空虛嘅心靈。

真文青係藝術家,唔靠外表叫糊,但內涵足以叫人黯然銷魂。佢地唔係天生明星,型像只係過眼雲煙,簡約清潔就得。金玉其外,或者沐猴而冠之類嘅行逕,文青一定唔會做,因為文青嘅核心價值係才華,一樽陳年佳釀,年紀月老越醇。咩文青要玩木結他,用iPhone,戴金絲眼鏡,用無印良品等等,等同畫蛇添足。

真文青嘅FB多數冇一張個人照,就算有,最多都係加filter,而唔會左一個PS,右一個美圖秀秀。文青用嘅文具好兩極,貴嘅係工欲善其事,點都有隻萬寶龍,Parker又或者寫得出就得,黏花摘葉出手成文,而唔係喺個只係識得喺鍵盤前面任縱橫嘅六指人魔,筆都冇枝點做文青。

真文青多數不修邊幅。有部份會萬般帶得走,惟有煙隨身;有部份會睇龍虎門,龍虎豹等文壇巨著,談吐間中都會有粗口,黃色笑話。呢種係豪邁、直率、自由、不羈,絕對唔似偽文青咁睇進擊的巨人上腦咁,整幾塊道德高牆俾自己。

真文青咩地方都去,絕對不會鎖定只係去某幾個連鎖咖啡店呢D賣氣氛俾你自high嘅地方,一日一杯一個月都成千蚊,一定夠買"普及版"Pandora。真文青多數會去茶記嘆奶茶,賭下馬仔、睇下女仔,又或者去洗下雀仔。真文青多數一動不如一靜,唔需要預佢地踩單車爬山睇日出,打冷、打邊爐、落CLUB、沖涼、泵骨、睇書、睇戲先好預佢地。

真文青少去長途旅行,去都只會跟團,寫旅遊BLOG?放屁,去過邊又點?你去嘅地方人地去唔到咩?除非你係都獸啦。

真文青唔會喺FB無病呻吟,唔會打咩"無論雨怎麼打,自由還是會開花",依啲瓊瑤級對白,行為藝術可以齋用唱歌寫文代替?難怪書展至,嫩模現,畢竟畫面點都3D過文字。

真文青出口成文,唔係好似大酒店數白欖式介紹你同你祖先,就係黃色笑話。裝修師傅、司機、臥虎藏龍,中咩你個文系丫,哲你個學系丫,有冇聽過大樂必易呀?

要做個真正文青,你必須先去跟大叔們學一下道德高牆以外嘅世界,知道現實花花世界有幾花,除咗鮮花、紙花、絲帶花、膠花之外當然唔少得椰菜花;蒸魚除咗熟油、鼓油、薑蔥、蒜頭、陳皮、烏梅,仲有欖角豆鼓添,做人一定要有"欖"用!!!

最後,我謹向黃霑先生,我心目中的文俠致敬。