世上冇天才,只有狂熱,方法同犧牲。本人一直深信,世上根本冇所謂的天生天才,而最近科學家亦證實,智商(IQ)高嘅,都唔一定是天才,智商與成就根本冇直接關係。今日就同大家講下音樂呢方面嘅「鋼之煉金術士」-咩叫百煉成鋼。

最近有一段怪獸家長嘅對白,對我嚟講印象特別深刻。話說鋼琴老師喺休息時間練琴,家長睇到就有微言,話老師琴技唔得,半桶水就教學生根本就係誤人子弟等等……

100%的天才,係犧牲大量時間,反覆練習而成,我亦親身測試過所謂IQ Test,第一次玩我只得120分,玩幾次之後就升到140,即係所謂嘅天才。只要通過學習,反覆練習,成果最佳化嘅方法,任何人都可以係天才。相反,天才同白痴冇分別。

我用我自己成30年時間不停學習同研究,但係喺音樂方面我比較遲起步,我滿17歲之後先開始學結他,20歲學樂理,30歲學琴,對任何人嚟講都係好遲起步,用怪獸家長專業術語嘅講法係「輸喺起跑線上起碼有幾條彌敦道加埋咁多」,但而家我已經可以喺一班所謂八級人士面前行出嚟,做到八級人士做不到嘅事,我由作曲,編曲,樂理一直研究,學習,永無休止,由完全音樂白痴,到能夠作曲,混音,編曲同填詞。我由一直被視為五音不全,到變成擁有絕對音感。一切都唔係天生,而係後天咬緊牙關嘅成果。

普通人一日練習4-8個鐘已經係極限,但我可以唔休息,唔食飯咁練習。宮崎駿被視為動畫之神,但係佢都唔係咩都唔做,謝主隆恩就能夠擁有今時今日嘅功力同成就。在佢嘅訪問入面,佢話,食飯係最浪費時間,如果可以唔食,佢寧願畫多幾張圖。有呢種狂人一樣嘅狂熱,先配得上天才嘅稱號。單單IQ高就稱為天才,其實本身嘅才能會因為懶散,慢慢消失。我記得N年前讀中學嗰陣有一篇文章叫「傷仲永」,不過今時今日啲學生都寧願上高登睇潮文,開「17」止止痕先啦。

咁多年嚟,我一直相信,只要你肯花時間,冇咩事情是人地做到,你做唔到。出面你睇到任何人都可以做到嘅原因在於,你只係睇到人地成功呢個結果,但你睇唔到人地用幾多時間努力,流過幾多血汗,克服幾多困惑同障礙。雖然,現實世界係好殘酷,有才能未必有人欣賞,但人生是為了俾人睇,定係對自己有所交代?別人做得到,你都做得到,但係咁唔代表人人跟同一條formula都一定成功,所以刻苦唔怕輸係必須要的。

基本上,我們係可以訓練一個愛因斯坦出嚟,因為我地已經累積咗幾千年經驗同學識,只係你不知道應該點訓練。你唔知道愛因斯坦係點喺實驗室練習做實驗,點思考。科學家研究多年,愛因斯坦嘅智慧,根本與腦細胞冇大關係。 主要原因亦不礙乎環境因素,教育因素等等……

反而,創造力先係天生嘅先決條件。創造力不是單單講求努力,冇就係冇,就好似一條蒸魚,死咗就係死咗,唔會翻生,死咗之後會翻生嘅係叫Walking dead;而且冇靈感冇創造力,亦唔係可以用時間嚟彌補。Steve Jobs亦講過,創造力先係人們最需要珍惜的東西,知識只係基礎。香港現今嘅教育就係教你知識,但係啟發創造力嘅教育係近乎零。創造力唔係靠天啟,一定要靠自己近乎狂熱,永不止息嘅熱誠。有機會當你用緊4分鐘喺大圍站為埋一齊唱「今天我」自high嘅時候,我已經寫好四份一首歌嘅歌詞。所以話點解真正嘅音樂人好似有D離地,係因為佢地的確俾你優秀-音樂嗰方面。

要做到不眠不休地做一件事,先天因素就是要有興趣。雖然南韓有首歌"A-yo"裡面有句歌詞為"One for the money and two for the show",香港人正正係先為錢,所以學音樂普遍唔係興趣行先,又邊會有狂熱(Mania)呢,呢個正正係香港人除咗考試以外都唔夠其他人強嘅原因。以前睇過一個電視節目,係一個漫畫迷挑戰賽,當中的問題你聽到都覺得分分鐘原作者都唔可能答得出嚟。其中一條係Touch單行本,第2期,第101頁,第3格嘅對白是什麼。我當時真係唔相信竟然有人可以一字不漏咁答啱。旁觀者覺得佢可能係擁有天才嘅記憶力,但係我會覺得,若果佢唔係每天苦讀每本漫畫,不眠不休咁溫習,最重要係佢對個故事百看不厭,你一定留意唔到。

如果你讚別人一句天才,其實你係抹煞緊佢嘅努力。好似話,你咩都唔使做就有咁嘅成果,真係幸運,係gift from god。所有演奏家,都一定經過超長時間苦練,我唔信李雲迪唔使練習,我唔信葉詠詩唔使練習。科學家統計出一個數字,所有所謂天才,必須經過10000小時的投入。Beatles樂隊走紅之前喺酒吧演出超過10000個小時;Bill Gates創立微軟公司之前編寫程式超過10000個小時。畫家畢加索齋畫蛋都三幾年,音樂家莫扎特、籃球運動員Michael Jordan都有超過10000小時嘅訓練。成功嘅秘密,根本不是秘密,就是不停地做。結他手Yngwie Malmsteen喺訪問中都被問到,點可以極速彈奏,佢強調三次,練習,練習,都係練習。他就人人口中所謂嘅天才,五歲開始學結他。但佢唔係咩都唔做,佢係不斷練習,不斷失敗,再不斷練習。

但係而家怪獸家長們都催速緊佢地嘅仔女成為天才,覺得有錢,有時間,有方法仔女一定出人頭地,但係,態度同興趣呢兩樣條件反而被忽視,令興趣變成一種強迫,苦差,學得到技巧呢個軀殼,啟發唔到創造力,就好似大把人有黑帶十段,但係李小龍就只係得一個。以為單單經過長時間訓練就會成為天才嘅誤解,就好似你有本食譜就係廚神一樣,咁就死啦。