Chrome現殘體字型？將Chrome顯示語言改回正體中文即可解決

Chrome 預設使用殘體字型 SimSun？將 Chrome 顯示語言改回正體中文即可重現新細明體。

圖片來源：作者提供

圖中左側邊係新細明體 (Windows XP 版本)，而右邊係 SimSun。前者係正體中文標準字型，較為美觀；而後者係殘體標準字型，較為醜陋。

兩款字型都會於 Windows 在低解像情況下，以點陣方式顯示，否則就以向量方式顯示。圖中可見，SimSun 之點陣化設計差過新細明體。其筆劃壓縮樣式令字型不合比例、不勻稱 (見圖中正文，圖下有放大範例)。

新細明體字型正方，SimSun 字型明顯高度大過闊度，在點陣樣式中最為明顯。圖下新細明體係 11*11 點，而 SimSun 係 11*12 點。向量樣式亦然。

再講字體，SimSun 屬殘體標準，如「體」字左上作┐而非┌；「文字」一點陡斜，偏離明書寫法，又偏離港人手寫風格，其他地方亦可察看出 SimSun 之殘體標準。美醜之別，可以仔細察看圖片，以及自行用 Word 以兩款字體打字以作評價。相信閣下與我會有相同判斷。

為何部份用家在 Chrome 瀏覽正體中文網頁時，會自動使用殘體中文字型？直接原因，係因為 Chrome 顯示語言並非正體中文。經過我多番測試， Chrome 顯示語言係會影響網頁字型。而若顯示語言係英文， 估計 Chrome 選擇字型時，都會使用殘體中文 Fallback List，因此 Facebook、Google 等網頁都使用 SimSun 為預設字型。

要解決此問題，不能以在設定中將全部字型改為新細明體解決，因為部份應使用無襯線英文字型之網頁如維基百科，都會因而變成有襯線英文字型  (新細明體英文字母有襯線) 。

將 Chrome 顯示語言改回正體中文，即可不必改動字型設定，而解決問題，停止 Chrome 使用殘體中文字型。