中秋啱過,今年個月亮又大又圓,又好彩唔會好多雲,相信對於鐘意賞月嘅朋友黎講,係一個美麗的節日。不過,中秋節如果只能「舉杯邀明月 對影成三人」,就不免太過於孤單了。

中秋晚上,做完節同屋企人食過飯之後,總不免想好似以前咁,約一大班朋友出黎共聚一堂。
但係,當朋友開始變老,你會發現,原來朋友,係好難見架!

你:「喂!你黎唔黎啊?」
A:「我今晚唔得啊?」
B:「我都有事。」
C:「大家都唔得,咁不如下次啦?」

你:「……咁下次啦。」你唯有係「朋友係要見架!超級開sem reu」gp度打埋呢句,之後都係番去忙埋本身要做嘅野。

近呢幾年,舊時嘅朋友愈來愈難相約起來,聚首一堂。就算係以前一定會約出黎玩通宵嘅大時大節,大家都開始各有各忙。

朋友由「係要見架」慢慢變成「係whatsapp見」。最大鑊嘅係,再大個D,你自己都開始接受現實。
約唔成就算啦。「算啦,都唔係好重要姐。」不論係三年朋友,六年老友,十年死黨,到有一日,原來你突然會覺得「算啦,都唔係好重要姐。」

你會情願花時間係你唔鐘意嘅工作上,你會情願花時間係應酬新識嘅hi-bye friend上,你會情願花時間係屋企休息一下。

正正因為佢地係朋友,你知道佢地唔會介意,所以就愈來愈難見。

每次攞起電話,想約朋友聚舊,結果唔係呢個唔得就係個個有野做,回想起上一次見到一班老友,好似已經係……已經係你仲有朋友嘅時候。

個時嘅你,可以一個電話出黎陪朋友一晚,可以一聲令下幾十人忽然走左去踢波,玩到樂而忘返,再晚飯糖水啤酒直落。
到底係你真係愈來愈忙,定係覺得朋友愈來愈無所謂呢?

「喂!中秋出唔出黎啊?」

所以當仲有朋友唔識死黎煩你,千奇唔好比兩個藍剔對方就算數。因為你有一日會回頭發現,當你想搵番班朋友出黎聚舊嘅時候。可能大家都已經生疏曬,真係你有你嘅生活,佢有佢嘅忙碌。

珍惜仲會re嘅u,珍惜仲可以傾通宵嘅晚上,珍惜雖然大家都已經唔再年輕,但同你一齊嘅時候仲會好似以前咁嘅朋友。