我都唔記得幾時講過,唔好俾雨傘革命變咗6.4咁,最後淪為口號,每年記念一次而無再實際行動。

89 6.4嗰陣,香港人都義憤填胸,有成百萬上街,當時群情凶湧,如果以當時情況,香港關閘唔做大陸嘅經濟窗口,對大陸係可以做成一定威脅,可惜當時無咁做,當然歷史係無如果,但係歷史係一個教訓,等人唔好再重蹈覆轍 。

住後幾年嘅6.4晚會,香港人都仲係上心,不過隨時間過去,香港對大陸除咗聲緩,就無咩實質野做過,再過幾年之後,香港人對6.4嘅激情亦都逐年減少,幾大嘅民怨都好,無再一次起義都係會磨滅。

後嚟香港對推倒中共政府嘅威脅,更加變得微乎其微,機會嘅野唔係次次都有下次,錯過一次唔知要等幾耐。

香港嘅血依家毎日都俾人放緊,醒覺嘅香港人要做嘅係面對失敗,痛係要記住,咁先可以痛定思痛,要好好裝備自己,學多啲野又好,操 fit 自己又好,唔好俾時間浪費,將來一有機會就要好好捉緊,我地要嘅並唔係精神勝利。

如果大家覺得攰嘅,休息一下都唔係壞事,不過唔好俾藉口自己再瞓,亦都唔好沉淪悲情,咁只會令自己喪志。