昨日,泛民同民間團體召開記者會,交代有關「雨傘運動一週年」紀念活動嘅事。筆者原本對依個坊間戲稱為「雨傘節」嘅東東並冇多大感覺,只覺得佢係泛民收取捐款嘅一貫伎倆,但由於庭妹病入膏肓仍須出席記者會,不由得怒火中燒,不得不撰文發洩心中嘅不滿。

photo478116090559441054

是次記者會嘅主題係:「抗命無罪,毋忘初衷」。我當堂嚇一跳,然後得啖笑。居然有班話「和平係我地最大武器」嘅人講抗命,咁抗命擺到明就一定無罪架啦——奉公守法,何罪之有?依一年嚟,你地有抗過命咩?小弟印象中,成班開記者會嘅人裡面,就好似得庭妹同羅三七比人拉過,咁其他人呢?睇睇大合照,邊個係入面就唔重要喇,畢竟小弟大部分都唔識,同埋我眼中就只有庭妹一人。一大班人手拖住手,高喊口號。你地團唔團結小弟就唔知喇,亦冇興趣知社運圈既種種黑暗,不過呢,你地令小弟聯想起上年十一國殤果條人鏈……

係呀,講梗你地呀!

係呀,講梗你地呀!

 

OK!冇比人拉唔代表你地冇抗過命,咁講下「毋忘初衷」。唔知你地仲記唔記得你地口中嘅「雨傘精神」係乜喇,又或者仲記唔記得上年點解會咁多人行出黎同大家係夏愨道做咗啲乜,但好肯定唔係拖下手仔,叫下口號咁簡單。細閱雨傘節當日嘅節目,只能用豐富黎形容:有藝墟、敬拜、祈禱會、電影欣賞、培靈會、默站、演講,當然唔少得經典既撐黃傘活動。先唔好講佢真係好似一場崇拜——又有敬拜,又有講道,又有祈禱,最後仲有得收奉獻(雨傘援助基金),乜依D活動係「毋忘初衷」咩?架下舉咩黃傘, 上年催淚彈丟到埋黎既時候,乜你把遮係黃色既咩?仲有,唱乜野歌啊,乜上年你用歌聲擊退敵人嘅咩?如果你話紀念劉邦當年四面楚歌打敗項羽嘅話,咁都算講得通,唔係嘅話,你同中共以閱兵紀念二戰後嘅和平同樣諷刺。

photo478116090559441056

雨傘嘉年華節目豐富,有獎抽,有女媾。

其實雨傘節係點,小弟真係冇興趣知,但正正因為庭妹病咗,仲要高燒不退已經差唔多成個禮拜,仲要出席個不知所謂既記者會,先至十分心痛。大合照所見,庭妹明顯萬分唔願意同人手拖手影大合照(拖手嘅野應該留返比我同庭妹私底下做),除咗因為太病太累之外,佢心底裡亦唔想去埋依啲無無謂謂嘅活動。記得庭妹曾經講過,佢唔會視雨傘節為「一週年紀念」,因為失敗嘅運動冇野值得佢去紀念。但就係你地班大愛人士,懶係矯情做作,係都要搞埋啲記者會吖、訪問吖、紀念活動等等。大佬啊,庭妹已經病咗,好心你地就比人休息下啦,少個學民思潮嘅代表唔會少好多籌款嘅姐。為咗籌款,為咗你地所謂嘅「毋忘初衷」,搞到一個少女病情加劇,你地過意得去咩?

你地鍾意舉辦雨傘節又好,六四節又好,唔關我事,反正騙徒嘅手法層出不窮,依一年嚟你地借用雨傘革命嘅名義撈油水已經好多次,多一個「一週年」唔多,少一個唔少。但係如果你地搞到庭妹,咁就別計。小弟求求你地,如果你地仲有啲良心嘅話,假如庭妹仲未病好,就唔好比佢出席你地果啲無謂嘅紀念活動,當係為自己積下德都好……