大家好!我叫阿青,啲朋友成日叫我憤青。細細個嗰時我已經好相信一句說話,古語有云:「人無夢想同條咸魚有咩分別!」,所以我選擇嘅生存方式係要有理想、有意義、有抱負!絕對唔可以同條咸魚一樣。我自小係香港土生土長,對佢有特殊嘅感情,香港對我黎講就好似屋企人一樣。比如老豆過大海賭錢,輸到底褲都冇埋,仲要推呀媽去洗大餅幫佢還債,自己就日日去馬會等返本,我都要認佢係我老豆。因為我係佢親生嘅。我自問冇哪吒既勇氣,可以削骨還父、削肉還母,或者捐入呀媽個肚重新投胎。所以「來生不做香港人」真係來生嘅事,諗咁多,壞腦呀!而作為有理想有抱負嘅知識青年應該要同命運抗爭,係時代嘅巨輪下生存落黎。

可惜生活始終都係殘酷。以前2蚊嘅麥當勞新地筒到今時今日已經升價到4蚊,加幅高達百分之百,遠遠跑贏通脹,可見商家對市民嘅剝削。然而面對如此嚴峻嘅壓迫,我亦只能嘆一聲命運!點解當初麥當勞加價5毫嘅時候冇人出聲反抗?巨人眼中嘅市民從來都只係青蛙,只要慢慢用暖水煲滾,咪又係死到臨頭猶不自知。大多數人一直都用沉默嘅態度黎形成高大嘅巨人。

我一直都話未來係由過去一點一滴累積而成,不過我地响過去都學到唔少野。我地從拉布學識拖延嘅重要性,再响雨傘運動中靈活運用出黎,成功完成65日毫無結果嘅革命運動。再例如當年毓民扔蕉揭開議會暴力嘅第一幕,發展到其後使用恐嚇式言論威脅林鄭月娥,正正預言著其後一大輪理性非和平嘅抗爭運動。最近發生嘅港大副校長任命會議被學生闖入佔領,咪就係大家效法立法會議員行為最好嘅體現。社會上有咁多楷模,年輕人嘅反抗之路一定會行得更加成功。

尤其近年我地召集民眾力量比往日方便好多。正所謂不平則鳴,只要有咩唔對路,一上高登,即刻可以召集到一眾共嗚人士,形成群眾力量,表達我地心中訴求。只要大家都 唔指名道姓,有邊個可以話我誹謗?我都冇見過人上網亂嗡俾人拉嘅。最緊要就是含蓄小小咁影射下,唔洗負責任架啦。直接表達自己立場同苦況,就可以開始踩低人地抬高自己,反正我都冇開名,邊個叫佢地對號入座。客觀事實、限制條件、對方難處等等,全部都唔洗諗,我諗埋佢地個份,咁個社會咪無衝突?唔得!點可以無抗爭㗎,咁咪顯得我地後生一輩好無思想,我地假假地都係被時代選中嘅細路!

講起上網吹雞,真係唔可以唔提依家上網方便到不得了。一上Facebook、高登、香討即刻知哂今日香港發生過咩事。真係咪講笑有時仲快過報紙!有時仲有第一手資訊,唔洗等睇採訪。唉!前排咪好多報紙公司都執笠,其實我都好明白佢地幾慘。香港話就話有言論自由同新聞自由,但係睇著進圖哥哥俾人砍同國安法成立。我都只能嘆一句。大勢所趨,無計!佢地作為傳媒仲需要為自己言論負上責任,隨時日日都有人寄律師信俾佢地。佢地俾人告都唔驚,就知平時啲料幾真啦!不過依家冇呢支歌仔唱啦。開講都有話有圖有真相,由網友看圖講故仔,啲料又快又有趣,教我如何不信他!個個都係上網睇呢啲㗎啦,有時仲鬧得好過癮𠻹。不過聽講言論自由好似建立在不傷害他人的情況下。下?咩黎㗎?

計我話多元社會即係好似多項選擇題咁。唔係一就係二,再唔係咪三同四囉。無可能有第五個答案。如果唔係,咪變問答題?個個答案都唔同,個社會咪好煩?非黑即白是常識吧!依家唔係是非題,而係多項選擇題已經好好啦!非洲啲人連揀都冇得揀。所謂非我族類,其心必異,我真係好嬲個啲冇立場嘅香港人囉!容納不同聲音不是香港的特色嗎?依家咪俾你地出聲囉!連A、B、C、D都揀唔到,唔怪得之,啲人成日話啲後生仔連呼吸都係錯。

評語: 追求生存,對。 只有生存,不對。要記著,老人終會老去衰弱死亡, 而你能得到的不僅是生存, 而應該是勝利。(鄭立)