港隊大戰真正強隊卡塔爾

雖然係輸咗波,但係就令香港人熱血回歸,包括最近覺得好頹嘅我。

今次真係見到港隊遇著強隊毫無懼色,遇強愈強,逆境下仍然奮力頑抗,同嗰種俾自己籍口話“盡咗力“就算嘅態度,係不能同日而語。

依種頑強鬥志先係香港精神!

難得嘅係一班香港人,係3:0嘅劣勢下仲全力支持港隊,係自己地方,有自己人支持,對運動員係一件好感動嘅事,鬥志同士氣好重要,俾著我去比賽有人同我講 we are Hong Kong 真係流馬尿都似。

唔只對於運動員,一場真正嘅體育運動就係可以團結人心,燃起鬥志,依啲正正就係有人唔想見到嘅事,有人出到口話體育對經濟無貢獻,政府似乎無心發展體育。

而香港嘅體育組織係我印象之中亦一向黑暗:

足總主席梁孔德可以話鬧香港球員係狗 「 好小事 」 ;

盲總涉阻查林榮順因延誤救緩枉死,仲搵靈媒「上身」話死因係「醫院疏忽」;

香港田徑總會攪個渣馬,就淨係識谷人數唔封頂,比賽亂到七彩,上年仲要搵秃鷹主持開幕,渣馬根本就係田總 cap 水同搵市民做佈景版察政府鞋嘅活動,與攪好體育無關。

要真正支持香港運動員嘅,似乎就只可以靠香港人自己。

p.s. 香港嘅運動員唔係臘鴨呀!