港中矛盾、海報事件加上港隊將士用命、熱血非常,對上三場嘅世界盃外圍賽港隊都有好成績,一時之間大家對香港足球都好熱情,對卡塔爾呢場嘅波飛聽講炒到成六百蚊張!(炒黃牛死全家!)
支持港隊(而且神早買左套票)嘅我當然樂見香港足球再受注目,但網上部分睇開香港波嘅師兄對呢個情況不以為然,有啲仲話呢班只係勝利球迷,如果港隊輸波,熱情一過就會散水,屌住咁走。
先唔好咁消極住,其實大家最初都係由勝利球迷起步架啦,你都係覺得隊波踢得好,其中邊個球員好波咁先會慢慢鍾意隊波嘅姐,勝利球迷都可以一場一場咁變成死忠球迷嘅。

有見及此,入得幾次場嘅小弟都為煉成更多港隊第十二人出一分力,獻醜地分享下有咩要注意,等大家今晚可以做足準備。

《新手球迷版入場小貼士》

1. 開波時間唔等人
今場對卡塔爾,開波時間係八點正。無論你想噓定係想唱國歌,你都記得要係開波前大約十分鐘入咗場先做到,而根據上場我撳足一百分鐘平安鐘嘅經驗,就算係頭一分鐘,都可以出現好多驚險刺激嘅場面。唔同入場睇戲,錯過咗你要等聽日睇番精華。同埋今場足總會喺大約六點發售限量打氣Tee同紀念品,總之入場盡量趁早啦!

2. 球場設有站立打氣區
站立打氣區同其他座位最大嘅唔同就係唔會(或者少啲)比人鬧阻住佢睇波,同埋呢個區域係預設用嚟──打氣嘅!

本地球迷組織The Power Of Hong Kong 香港力量喺大部分賽事都會入場為港隊打氣,今場佢地會係旺角場31同32段度全場90分鐘不停叫口號、搖旗同唱歌,無錯係90分鐘不停打氣。佢地好歡迎大家去一齊打氣,留意番請盡量著港隊主場/紅色衫,其他詳情睇番佢地專頁更方便~

站立區嚟講,氣氛係好過其他位好多嘅。身為球迷嘅我自己都會坐入去,而且有其他聲墊住底你火起大叫DLLM都無咁尷尬嘛。但如果你係拉鏈嘴一粒音都唔會出,或者現場嘈過30分貝你就頂唔住,甚至係反港隊嘅,咁我建議你可以選擇其他好位坐,唔好令到打氣區無啦啦油灰左幾格咁,聲浪又無咁集中。講真,入得場都係嚟支持港隊架嘛,球員落力係場上踢緊,我地係看台上都唔駛怕醜,出力嗌啦師兄。

無錯,我都知卡塔爾同中國係超級難打,咁難打嘅賽事我地當然要用下腦去搵優勢番嚟。有巴打開post問點樣可以將大球場旺角場變成地獄主場,我諗每一隊波嘅球迷都希望可以將自己球場變成地獄主場,係因為地獄主場嘅氣勢會震懾到對手,令佢地出腳波都怯啲。而家講爭取世盃外同亞洲盃資格呀,打緊仗呀喂!所以就算只係幫到丁屎咁多,只要係有用,主場球迷都值得做、應該做、快D做!
當然咁多位球迷最想見到嘅情況係,由31,32段蔓延開去,每一段都成為站立打氣區,每一位球迷都大聲過張飛,到時旗海飄揚、殺聲震天,成為香港隊真正
嘅地獄主場!

3. 無架喇,你準時入場,而且仲會嗌破喉嚨出力打氣,表演已經神奇頂級超卓啦,買定野入去食、唔好帶玻璃樽呢啲無可能考到你喇,係咪?

希望對咁多位新港隊球迷有少許嘅幫助喇!We are HONG KONG!