成熟係男士最吸引既條件之一。十個女人八個想男伴成熟,一個成熟既男人係愛情既魅力可以話係「沒法擋」。但好多人成日搞唔清楚成熟同佬味嘅分別,一味覺得三字頭既男人就自然成熟。成熟呢一種氣質其實同年齡冇絕對嘅關係,並唔係好似牛排嘅幾成熟咁煎得愈耐就愈熟。你要佬味就一定係搵返個最少三十而立嘅男人,但如果你要搵嘅係成熟,麻煩唔好咁快沒殺班二字頭。

點解好多人會認定成熟一定係比較「佬」果班男人嘅專利呢?或者我引用維基對心理成熟嘅定義:「心理成熟是指心理指隨著時間的推移向著圓滿生長,有能力以恰當的方式對社會環境做出反應。反應通常而言是靠學習而得到的,而非先天本能。成熟也意味著根據情況和社會文化,知道做出某行為的正確時間和場所。成熟強調對生活目的、方向有清楚的認識,從而感到生活是有意義的」。成熟係要時間浸淫,照道理經歷愈多嘅人會愈成熟。但每個人用黎裝成熟依種特質嘅杯都唔同,有啲人依頭倒完果頭就瀉哂、有啲人樽口極細有排你倒、有啲人接受力強,好短時間就裝到好多。成熟其實係要睇個人嘅學習能力同所遇所見,正如你比同一本書比一百個人,每個人讀完嘅速度都唔同。

年齡大啲嘅理應接觸社會人同事比較多,但到底佢有幾多次可以從錯誤中學習,又或者佢有幾願意去學習都會影響到一個人有關成熟嘅表現。你話一個三十歲仲處處唯啊媽馬首是膽永冇SAY NO嘅「佬」,係咪真係你想像中咁成熟呢?而一個後生仔佢可能經歷過嘅人情冷暖同世態炎涼又係咪一定比個大佢幾年嘅人少?若果你要計比例,三十歲成熟嘅人理應比廿五歲嘅多,但當中都會有唔成熟嘅三十歲同成熟嘅廿五歲。緣份依樣野好化學,你可以同十個三十歲嘅人拍拖都覺得係湊仔,但反而第一個廿五歲仔就比到一種成熟嘅感覺你。就好似你買左一百次六合彩都唔中,但有人買一次就中頭獎一樣。

成熟係需要時間,同樣你要知一個人成唔成熟都要時間。單憑外表去判斷既只有外在條件,即係佬味;如果你想望一眼就知佢成唔成熟,我反而會覺得係你膚淺。維基所提到嘅「生活目的、方向」其實我覺得好多後生比中年人更加清楚,你問個三十歲嘅生活目的可能係加人工,但廿五歲嘅可能會有更遠大志向。碧咸嘅佬味只有佢而家依種有滄桑感嘅「中佬」可以散發出黎,但佢對人生嘅目標、對家庭嘅愛護、對另一半既愛錫,我相信香港都會有做得到嘅「後生仔」。

一個讚好,是對我的一點支持。
如果想分享給其他朋友的話,請標明出處並附上專頁網址。

https://www.facebook.com/MaoYanDe