冇錯瑞士係第三世界國家,咁又有乜出奇?

你撳得嚟睇,大概係因為你覺得瑞士同你本身對「第三世界國家」嘅認知有多少出入。講到第三世界國家,好多人都會諗起,窮,亂,戰禍,貪污,同營養不良嘅細路,但呢啲係咪第三世界國家嘅界定因素呢?

舉個例,埃及,印度,卡塔爾,阿根廷,瑞典,同瑞士都係第三世界國家;但北韓,埃塞俄比亞,莫三比克,納米比亞,同越南就唔係第三世界國家。「第三世界國家」呢個標籤,不時都會係大眾媒體出現,尤其係意見專欄,但係都比作者賦予獨特意思,嚟遷就文章嘅內容。

「三個世界的模型」分類係二戰後被廣泛應用:第一世界係指英美同佢哋嘅同盟,包括西歐,加拿大及澳州等國;第二世界指嘅係中蘇及其同盟,例如越南,北韓,同古巴;而第三世界國家即係指所有其他國家呢啲國家普遍參與不結盟運動。至於點解咁不結盟運動國家發展都比較少,係因為好多都係前殖民地,佢哋參與不結盟運動,係因為受夠歐洲人嘅世界大戰,唔想再扯上地球另一端嘅紛爭。三個世界嘅區分並唔係建基於經濟或文化嘅發展,而只係單純以政治結盟同意識形態作分別。瑞士作為一個永久中立國可以話係第三世界國家嘅最好例子。
毛澤東嘅「三個世界的理論」,係一個冇咁常用到嘅區分。指嘅第一世界係奉行帝國主義嘅美蘇超級大國,第二世界係較發展國家,而第三世界係少較發展國家。

以上兩個「三個世界」嘅區分,都唔係媒體想要嘅定義。「三個世界的模型」中,國家只係又冷戰陣營嚟分別,三個世界之間並無高低,第三世界唔一定窮,第一世界唔一定都先進。如果話其實大眾媒體引用嘅係毛澤東嘅「三個世界的理論」,亦都講唔通,因為英國,日本,澳洲,德國就唔會係第一世界國家,李光耀亦都無將星加坡從毛澤東指嘅第三世界國家,發展成奉行帝國主義嘅超級大國。

其實「三個世界的模型」同「三個世界的理論」都係描述緊上個世紀嘅國際關係,時至今日已經唔太準確。1991年蘇聯解體,結束咗冷戰,個年出世嘅大學都畢咗業一陣,有啲仲結埋婚生埋仔添,冷戰嘅陣營分界,到而家已經好濛糊,而大部分前蘇聯國家都已經放棄咗社會主義。主宰國際關係嘅已經由意識形態,轉變為商貿經濟。俄羅斯無力繼承蘇聯超級大國嘅地位,而美國嘅地位亦正受中國同歐盟威脅。

冷戰結束咗仲分三個世界,就同仲叫日本,德國,意大利做軸心國無乜分別——係對現今世界實況嘅無視。如果你有幸睇到一篇文章題及「第三世界國家」,或者「XXX淪為第三世界國家」,「第三世界國家反攻XXX」等,好大機會寫嗰個唔係好知自己想講乜嘢。

邊個話有錢唔可以做第三世界國家架?