因應亞視不獲續牌,馬會由8月1日開始將六合彩轉播權,由亞視轉到無線J2繼續播放。過去兩個星期除了《蘋果日報》有C1頭版、加亞視新舊六合彩主持專訪、再加即時新聞不斷跟進外,其他傳媒不是輕輕帶過就是隻字不提。網上的反應亦未見非常熱烈,除了7月30日亞視最後一次直播攪珠、同8月1日無線J2首次直播攪珠,網民趁墟討論之外;不少買六合彩的人都認為︰「唔理佢係邊個台播,最緊要我中就得!」其實你估香港真係好多人鍾意睇六合彩攪珠咩?

亞視播了六合彩35年,除了1997至2001年無線播了4年之外,亞視由2001年7月開始再播六合彩直至2015年7月,這14年粗略計算都大約直播了2000次攪珠,除了亞視最後一次直播攪珠那期之外,有幾多人真係每期都睇攪珠直播呢?你對上一次睇六合彩攪珠係幾時呢?唔通一轉到J2播之後,攪珠收視會突然大升咩?不過最新的收視調查,連六合彩轉台播都無作出比較數據,調查公司連做統計都覺得係多餘!蔡國威做了六合彩主持十年,因應六合彩轉台播而被逼退下來,已經是亞視近年來的長壽主持,與蔡國威做拍檔輪休的主持卻幾年一變,由何彥樺、戚黛黛、周嘉莉到袁潔儀,有時蔡國威做足一個月十三次攪珠的主持,觀眾對他點樣不會有深刻印象呢?其實塞翁失馬,焉知非福呢?

無線J2由8月1日開始直播六合彩攪珠,無線亦派不少藝人到馬會面試,結果就由馬會安排的蔡運華做頭一個月的主持,原因聽聞是馬會及無線分別收到反賭團體的投訴,指用無線藝人做主持會變相鼓吹賭風。其實有名你叫反賭團體,當然是逢賭必反,他們不爭取直播六合彩攪珠要「PG家長指引」已經相當畀面;蘋果就指無線會用范文雅及吳珮如做主持,如果一個主持可以影響到投注額的話,咁亞視搵「90後」的周嘉莉做主持,或者2014年新春金多寶搵陳嘉桓做嘉賓主持,一樣係年青人,反賭團體何曾出過聲呢?不是就一定認為無線藝人真的可以呼風喚雨,馬會曾經講過有四百萬人買過六合彩,但攪珠直播何曾有四百萬人睇呢?大把人買六合彩都不是因為一個主持就吸引到買啦,多數都係被頭獎基金吸引,所以擔心用無線藝人做主持會鼓吹賭風根本就係多餘!

六合彩一星期攪珠三次、開足十二個月,一年都有百五期,有幾多人真係會每期都睇攪珠呢?要知六合彩結果方法多的是,打電話、上網、睇報紙、去投注站,未必一定要在電視機前睇實攪珠即時知結果。其實你估香港真係好多人鍾意睇六合彩攪珠咩?無線在J2播最多都是影響2點收視的觀眾,如果真的講收視的話,放在翡翠台播影響過百萬觀眾啦;J2播六合彩是一個正確的選擇,一來受影響的觀眾比翡翠台少,二來無線可以給更多機會年輕藝員去做主持,無論反賭團體定J2觀眾,講到J2播六合彩會杞人憂天、好似天塌下來,事實何嘗不是太陽如常升起呢?連我這個平時一分鐘都不睇J2的人,都因為六合彩吸引睇J2啦!如果攪珠直播不是做到似例行公事,可以做到當年夏春秋做主持連不買的都會睇,先至係一個成功的電視節目!