上星期,政府突然宣佈連炒兩位高官,本來公眾談論焦點都喺「垃圾桶」劉江華又升一級做到民政事務局局長,一日收入萬五,羨慕死班「廢青」,直情係「廢青」發奮向上嘅目標。殊不知,立法會主席曾鈺成喺佢細佬曾德成疑似被梁振英逼走之後連日發炮,完全同佢平日對住記者冷靜、高智商形象顯然不同,向港人大派花生。前日仲對住記者話,如果自己後生十年,一定會「忍唔住道氣」,仲會企出黎參選特首「睇吓你點整我」,矛頭直指梁振英,究竟點解曾鈺成今次會一反常態,全面開戰咁款?

事情返番去2012年嘅特首選舉,當時唐英年正受婚外情同僭建風波所拖累,梁振英好有機會嬴到特首寶座之際,政圈一直傳曾鈺成好想出手參選,但偏偏當年曾鈺成向外宣佈考慮參選特首嘅一個星期後,有傳媒爆料話梁振英親自打畀曾鈺成,直接要求曾鈺成退選,仲嚇佢講已經掌握住關於曾鈺成當年喺培僑任職時嘅黑材料。最終,十日後,曾鈺成向傳媒宣佈放棄參選,同時主動對外講「梁振英先生兩次打電話畀我,話佢冇我嘅黑材料、亦唔會搞我」,間接證實梁振英真係打過比佢,而黑材料一事亦唔係空穴來風。

而喺政改保皇黨「等埋發叔」一事之後,WhatsApp群組對話內容外洩,唔單止令保皇黨內訌呢個公開嘅秘密爆左出黎之外,曾鈺成亦都被揭發其實一直「操盤」參與保皇黨整個投票過程。政圈亦有評論話背後牽涉一場2017年特首選戰嘅角力,爆料人要令曾鈺成建立多年嘅中立同開明形象「一鋪清袋」。雖然佢已經多次表明唔會出黎選,但筆者懷疑呢件事係有人要再提一提曾鈺成:你咪喺道搞事,同我乖乖地做立法會主席,唔係連立法會主席都唔比你做。

其後AM730頭版刊出曾鈺成證實2012年佢表態認真考慮選特首嘅時候,佢立法會主席辦公室驚爆出竊聽風雲。唔單止懷疑被人暗中喺辦公室裝置竊聽器,佢屋企外亦疑似有可疑人士監視。由於佢辦公室唔係等閒人仕可以隨便入去,所以可想而知件事有幾嚴重,而更奇怪嘅係,呢幾件事一直去到梁振英正式當選之後先忽然消失,背後嘅一場權力鬥爭,相信讀者們都心中有數。

筆者強調,曾鈺成並唔係咩高深莫測嘅政客,同港視電視劇《選戰》中智叔所飾演嘅振民黨主席宋萬山亦差得遠,只係佢一直生活在一班豬一般的低智保皇黨隊友身邊,先令佢咁樣嘅一個人都捧上神枱。但面對梁振英這樣嘅對手,筆者全力支持曾鈺成企出黎參選,同梁振英攬住一齊同歸於盡,幫自己、幫細佬報番仇。