呢期心情好反覆,有一晚我突然忍唔住走向海旁,對住黑媽媽既大海大叫左聲「我好L唔開心呀!」睇落好似痴左線,查實真係同痴左線差唔多。

一直以黎個社會就係要教你戴住個面具示人,樣樣野都要好好睇睇。做人唔含蓄,直接表達自己既感情,人地會當你痴線,而唔係睇到你真心。樣樣野都要修飾,華麗先至係好,先至係正常。

係,顧人感受係好重要,但當日子一長,你顧人感受下你得唔到任何善意既回報時,情緒積聚壓抑太多,始終有一日會崩塌。

你對住你老細每必恭恭敬敬,就算擺明係老細你低能,明明就係佢冇簽名,你提佢冇簽名,就要話係你冇俾佢簽。礙於你反駁就會俾老細玩同炒,你就唔會出聲反駁。

對住D屋企人,個長輩發個爛渣,同佢講道理,你聽到「你有冇當過我係你呀媽?」你就得收聲。

甚至對住D女,想溝到佢,就只能暗暗示示大玩愛情遊戲先至得,直接同佢講我鐘意你,一句多謝都冇不特止仲會當你係痴漢。(P.S. 呢一點係我鐘意鬼妹既原因,至少佢地都會appreciate你既勇氣同讚美先。)

老實講,香港真係一D都唔識感恩既地方黎。所以左膠同教會講感恩,幾禁吸引人既事黎?至少佢地膠出黎個下,個樣真係幾真心,心情係會有被回饋既感覺先。

係既,總有D人會話唉呀奉旨要受你既咩?我只係覺得,大多數人都只識戴面具,而唔識去睇個面具底係咩野既人或者感覺黎。

好簡單渣嘛,人地潤你串你你又識聽?就係因為潤得你串得你既係一d修飾過,華麗D得體D既句子你就會明之餘又會俾人串得爽咩?其實根本就唔會,一樣都係會不爽,你只係唔知點去串番佢啫,根本你就聽得明。

我唔係講唔係所有人既心都冇惡意。而係點解只能夠為左攻擊人時先會去睇人地既惡意?呀唔係,應該係只會去發掘人地既惡意?

感情唔可以真摰禁表現,係源於冇人想去發掘善意。港人識計數架,冇著數既野,邊個會去做?我當真係冇著數,但又會冇壞處咩?

睇下香港,不公既野個心想企出黎鬧,就怕自己唔得體,D人當你痴線。個個忍氣吞聲。番工俾老細剝削,OT唔補水,做到身子就要賠埋,又怕俾人插又怕俾人炒唔出得聲。但你唔出聲,個政府同老細就越黎越惡,然後就笑你班人廢柴。就算家陣踩到埋身,你屋企飲既水都係鉛水啦,班居民除左等派水同等政黨幫你出聲之外,你班人仲做緊D咩?一句聲都唔敢出,你地生命唔係受緊威脅架咩?你當你生活緊係北韓?

呀,唔係既,佢地咪將佢地既情緒投放左係唔關事既家人身上囉。係呀,外面受完氣,儲完氣,就放入黎屋企入面架啦。對外人唔可以真摰表達自己呀嘛。更唔好彩,屋企個個蠻不講理,又控制慾強,一個唔覺意連係屋企都解放唔出呢D怨氣,就鬱住係心,變成精神病。我諗呢班居民,忍辱負重之下,身體唔殘唔廢唔死,就帶住情緒病精神病過世。

我好重言詞,有時寫多好多字去解釋自己既諗法,為既都只係避免誤會,而唔係用黎抑壓我自己既感情。但香港實在抑壓得自己既情緒同真摰太多。

所以就算我唔太鐘意單純偏偏文都係度大鬧社會政治blah blah blah乜都好,但我唔會覺得佢地不停鬧係唔好,因為至少佢地既感情係真的,我亦睇到佢地對社會既不滿,而唔係一個個既面具,一個個既修飾。

特別想鬧班老坑。鬧乜L野廢青啫?佢地動搖到你既尊貴,動搖到你既身份,動搖到你既事業?如果你本身係冇料,禁唔係抵你死?一個二個廢坑學足哂689呢個只係識弄權既災星禁,只係識玩人事,你地冇權冇勢個時,仲差過你地口講既廢青啦,至少我地呢班後生既,比你有創造力,比你更想社會同公司好,比你肯做,係你地冇俾出值得同肯定我地才能既回報渣!根本你地呢班廢坑同法國大革命同十月革命前既地主有乜L野分別?只係識得剝削,剝削農奴既生命同價值!

習慣修飾,習慣忍受自己既情緒不要爆發,習慣唔可以表露自己既真摰感情,冇人會去欣賞同體諒其他人既感受,同發掘其他人既善意,先至令到社會上受苦既人敢怒不敢言。相反,家陣既年青人,先至係改變社會既契機。……至少,開始會直言反抗公司同政府先。

最後,「我真係好L唔開心呀!」「你自己冇簽名仲賴我!」「我憎你用長輩既名黎撻我!」同埋我始終鐘意劈頭就講「我鐘意你。」