大家好,今次Cult噏將會為大家介紹同一個系列嘅兩齣Cult片,兩齣暗喻無政府主義嘅Cult片—《成記茶樓》同《大哥成》。

兩齣《成》片都係由Cult片大導演 桂治洪 於70年代邵氏出品嘅佳品。

16233050

《成記茶樓》講述大哥成(陳觀泰飾)為人豪邁,而且樂於助人,同江湖上好多人都有交情。佢同朋友合資經營一間「成記茶樓」以此為生。大哥成時常路見不平、拔刀相助,雖然佢唔係江湖中人,但偏偏解決不少江湖紛爭,深得黑道人士敬重。

本以為經營茶樓安安樂樂過日子,但係警方得知大哥成同好多江湖中人素有交情,於是勒令佢交出黑社會分子名單。大哥成深知如果交出名單,自己就永遠無好日子過,所以一直拖延。

另一方面,黑道中人亦想借機會乘機拉攏大哥成加入組織。大哥成雖然染有好重嘅江湖氣息,但係為人正義,非法犯罪佢絕對唔沾手,所以最後隱姓埋名。

16302443

年多後上映嘅《大哥成》講述大哥成為義氣重出江湖向惡勢力挑戰;期間揭發一宗江湖大騙局,鬥智鬥力過程中,大哥成妻子與及夥伴黑仔文相繼被強姦殘殺。

大哥成經過一連串復仇行動之後,巧妙避過警方線眼,再度退隱江湖。

兩齣片中未成年犯罪、箍頸黨、黑社會強姦殺人,都是為突顯出茶樓與大哥成超越警察與法律嘅存在。

16274091

前集《成記茶樓》桂治洪主要探討青少年犯罪,後集《大哥成》批判得更深入,喺面對暴力犯罪,普通人喺官方之外另一種解決問題嘅途徑,拳頭近法理遠,無論咩年代咩地方,大多數以暴易暴嘅意識都比身處嘅社會問題被逼出嚟。

另外桂治洪對於大哥成式無政府主義組織有多方面的闡述,既對大哥成鄰里糾紛上主持正義化解矛盾方面有肯定,亦對無政府主義組織居民喺自治下嘅團結互助,維護群體利益上有讚賞。

不過,除咗肯定同讚賞之外,桂治洪對無政府主義嘅自我約束亦有反思,大哥成近乎癲狂仇視、暴力對待惡人後逃脫法律懲罰,將有缺陷嘅法治狀況推向更加惡劣局面嘅隱憂。

movie-the-teahouse-still-mask9

桂治洪對當時嘅法治缺陷擺明咗批判態度,肯定咗民眾無政府主義自治嘅長處,但係批判唔係全盤否定,肯定亦唔係無條件支持,具體問題具體分析,並不一概而論,有贊成有反對,有批判有反思,可以拍出一齣針砭時弊片月旦社會嘅電影係桂治洪本事。

風格上桂治洪嘅鏡頭下擁有日本電影嘅陰沉與淒美。 甚至有啲刻意演嘢,鏡頭構圖同運用有啲模仿深作欣二《無仁義之戰》。

不過並非單純模仿,因為桂治洪所表達嘅電影情緒同深作欣二完全唔同,果一種玩世不恭無政府主義味道, 批判精神十足,寫實風格在當時嚟講十分超前,令筆者有一種歇斯底里又有衝勁嘅感覺。

70年代嘅邵氏電影,有啲對白同情節真好70年代,但係唔可以否認桂治洪某啲地方超越咗果時代, 意淫嘅無政府烏托邦 個人英雄主義以暴易暴,小小一間茶樓,大大一個江湖, 夾縫求生嘅現實,苟延不息嘅正義, 突兀結尾充滿悲哀。

64e710eaaca32bf7009cc45baf5b4c492