高登道「你的樣子如何,你的日子也必如何」,個樣靚嘅人條路總係特別易行,平凡甚至樣衰嘅天生就注定失敗。男神女神受萬人愛慕,手下兵將多不勝數,係面書打句早晨都有幾千個讚依點係我地凡夫俗子可以想像同經歷。但係天生唔夠人靚仔唔代表你就此玩完,要吸引男女生的話相貌只係其一而唔係唯一,發掘你其它好處,將佢表現出黎,其實你都會搵到一個自己嘅天地。

首先你要知道你冇可能行出街就吸引到異性,你冇可能好似男女神們咁每日一堆人希望約到佢出黎。佢地行嘅路線你學唔黎,你要接受依一點。你可能覺得個天唔公平,但世界就是如此,我地不得不認命。唔可以單靠外表吸引人,發掘出其它優點去增加自己嘅吸引力就係最好方法,你睇下香蕉奶又唔係靚仔有型又唔係手瓜起展,點解都有咁多女粉絲?無他,咪就係佢捉正時機係佔頷果排落街唱街,一炮而紅。先唔評論佢唱功同疑似呃錢件事,起碼而家嘅佢要約異性一定唔難,特別係班中學妹妹仔。佢覺得自己唱歌掂所以就咁拎支結他落街而成功,而在坐各位相信都有過人之處,咁點解唔係依方面發展?結他鋼琴唱歌依啲音樂喜好基本上係遇神殺神,再唔係跳街舞又吸引一班後生仔女。語言藝術亦都係吸引嘅地方,係適當時候講下笑,讚下對方之如此類,印像分急升。

你話你既專長可能「好毒」,淨係識打機整電腦,咁又點算好?就我所知香港都有唔少鍾意動漫嘅女仔,係返自己圈子搵返個興趣相近嘅人,你都唔會咁緊張亦唔怕冇話題。你話你既圈子冇,咁就唔該擴大一下,唔好次次就係同果一班傾得埋既同伴係CAFE玩三國殺傾動漫經。動漫節係集合一大班動漫愛好者既活動,平時都有唔同地方搞下咩COSPLAY之類,絕對唔會冇機會比你識一班志同道合嘅人。不過就算你唔係樣子滿分都好,都唔好是但著件動畫TEE闊腳牛七彩波鞋去,咁樣只會更加降低你比人既印像分。同樣個頭去剪一剪,戴眼鏡唔襯你就配副CON,我相信唔係一件難事。至於你話怕醜細膽就帶多一兩個朋友去,到時身邊話題全部都係你在行嘅如果你都唔敢襯機會試下識人,咁就神仙難救。至於你話連動漫都唔睇,覺得自己係零,乜都唔識嘅話就麻煩你試下搵樣興趣。彈結他出面大把人教,玩魔術又係唔難學,如果你真係有心去增值自己識下異性我諗唔到有咩理由唔去學。

君不見連衝仔都結到婚,你又有咩係冇可能。「毒撚最忌有自信」,但如果你一啲自信都冇,見到異性就望都唔敢望,咁你只好帶住依條「金科玉律」落棺材。自信同自大係兩回事,鼓起勇氣試下同異性打開話題,衰左都係果一下柒,但成功既話起碼行出左最重要嘅第一步。冇樣都有冇樣嘅生活,都有你既識異性方法。最重要做好自己,返工落力啲,野心大啲,興趣試下擴大啲。有機會接觸新既社交圈子唔好怕,都係果句,衰左人地第二日就唔記得左你,但得左你就多一班朋友,多一班機會。一個有自己興趣,工作進取認真嘅人唔怕冇機會識到異性。如果你日日返工放工唔去學返一技旁身,打份工只係望人地唔炒你,每日返到屋企就打機,唯一既外界接觸就係班機友。但同時你又上高登呻話第廿幾年冇女,點解識唔到個女神,點解個天咁唔公平芸芸,我唔怕係度得罪講句:咁其實係你抵死,與人無尤。

一個讚好,是對我的一點支持。
如果想分享給其他朋友的話,請標明出處並附上專頁網址。

https://www.facebook.com/MaoYanDe