屈女士話後生仔唔捱得,好多人出黎力保後生仔。
但係如果你係管理階層,對過後生仔,你就會發現,後生仔,真係有好多「廢青」……
讓柳臣冒天下後生仔之大不諱,盡數「廢青」七宗罪:

罪名一,hea。
出奇地hea,咩都衝死線。Hea唔係唔做野,而係個心覺得件事做唔做得成都冇所謂,唔上心,唔著緊。Hea到尾交份垃圾上黎,自己都仲可以覺得冇所謂,結果連累埋全個團隊。

罪名二,冇常識。
如果你帶過Ocamp,你就會見到凍水泡公仔麵既天才。唔識打呔,除左打機之外咩都唔知。之前新聞講有個女仔WhatsApp即時辭工仲叫老闆出埋份糧比佢。呢類新聞幾乎隔日就有,有D青少年的常識低得可怕。我還見過不會綁鞋帶的。有時指派工作比佢地,佢地就拖到最後一秒先做,你唔知我收咗你份野我仲要執你手尾架咩?

罪名三,冇交帶。
冇責任感既後生仔最常見,見一個想打一個。冇交帶體現係佢地冇時間觀念,成日遲到,唔覺得遲到係大問題。叫佢做既野唔記得咗,或者突然冇咗影,搵又搵唔到佢,到佢出現番,問佢去咗邊,又話冇去邊。一個人有冇交帶反映出佢做野既心態,自我中心既人總係覺得自己鐘意點就點,完全唔洗理其他人。最後叫佢做野仲辛苦過自己做埋。

罪名四,自以為是。
唔識唔開聲,以為自己搞得掂。搞唔掂又唔會開口問,等到人地發現佢未搞掂,佢先話自己唔識做。一係就自己做做錯曬!唔知以為佢啞嘅!結果反而加大咗其他人嘅工作量。

罪名五,眼高手低。
成日想一步登天,以為自己係不世奇才,又唔知自己蠢,又唔努力。一開始將個目標放到鬼咁高,最後實做唔到。講又唔信,結果又係臨事改計劃,費時失事。

罪名六,三分鐘熱度。
一開始嘅時候總係講到自己好有興趣,做唔夠兩日就開始懶,唔單止做嘢係咁。連改善都係咁,出錯嘅時候就誓神劈願話會發奮改過,但冇幾日就故態復萌。做嘢冇堅持,又求求其其。成日本住「做唔到又唔洗死」既心態。正一廢到核爆。

罪名七,死唔認錯。
衰咗第一時間推三推四,又天時又地利,陰陽五行咩都數曬出黎,就係覺得唔關自己事,唔肯認係自己衰。件事係你份內既工作,做唔成就係你既責任,淨係識推卸責任。其實好簡單一句:點解你會做得咁差?因為你冇常識hea冇交帶自以為是眼高手低三分鐘熱度囉!唔關其他人事,唔關天氣事,更加唔關命數事,一個唔聰明又唔努力既人點會做得成事呢?

釀成七宗罪的原因有很多,溫室小花,獨子,怪獸家長,教育制度,這裡不再一一分析,但只要你犯了這七宗罪,而你又未係好老,你就係一個名副其實的廢青。作為一個青年人,應該時刻檢討自己,多多反省,不要成為廢青。

利申1:年青人一名
利申2:我唔係話所有青年人都係廢青,只係我見好多呢D廢人,而佢地又咁岩係後生仔……