依家嘅讀者係用一個咩心態去睇一個媒體呢?

周不時見到有人睇到一個媒體有文章唔合心意就會話成個媒體都係衰格,叫個媒體執柒咗佢。

咁想點呀?係咪想全部媒體都只可以遷就某一方面讀者心意先得呢?

當年大俠金庸創立明報(絕非今天的日月神報),被譽為香港最有公信力報章。佢之所以咁有公信力就係因為有好大嘅編採自由度,真係可以做到百花齊放,左中右文章都可以見到,而且報道持平中立,當時贏得香港人極大信心,不過要講明一點,當時明報並非無立場,明報嘅立場可以係金庸寫嘅社論裡面見到。

我會諗,喺依家嘅媒體生態之下,當年嘅明報係咪仲生存到呢?讀者仲係咪咁想要一個有言論自由嘅媒體呢? 讀者會唔會已經期望咗果個媒體係俾某個偏向或者立場嘅訊息佢地呢?甚至係睇某啲媒體其實係為咗支持佢地嘅某啲信念呢?(依句應該得罪好多人)

大家有無諗過如果個媒體要遷就某啲人嘅喜好,文章或報道就要經過嚴重篩選,即係會無咗編採自由,就好似有人問個編輯“你係咪佢肚裡面條蟲“咁,大家唔係要新聞自由,編採自主咩?

我係度唔係想責怪任何讀者,不過係用我粗淺嘅認識討論下媒體嘅運作,令大家明白如果大部分讀者都覺得媒體係唔可以容納唔同意見嘅,其實就係鼓勵甚至係迫緊個媒體走向偏頗之路。

另外有樣野想講嘅係如果有作者投稿不成嘅千祈唔好氣餒,閣下嘅作品未能登上某一個媒體唔代表你嘅作品質素有問題,好可能只係因為你嘅作品過唔到個媒體某嘅嚴格篩選條件,例如係唔乎合媒體嘅立場。而我亦反對為咗能令文章登出而作出遷就,老實講,我覺得咁係對言論自由打壓而作出妥協。賣下廣告,大家可以試下投稿聚言,因為聚言唔會有太多篩選條件。

講多樣媒體控制言論自由手法,就係登你篇文出去不過就唔放上媒體嘅面書,上唔到個面書其實個流灠量會超低,即係話個媒體唔想篇文章俾人睇到。

利申:小弟為聚言時報撰文(實為冗員)

以上內容只代表本人立場