Cult片?B級片?
早幾日筆者一個朋友同我講:「我尋晚睇咗一齣B級片,好血腥,好暴力,好Cult。」
又早一排有網友留言比我話:「睇得Cult片多會令人變態。」
筆者聽咗之後,反而奇怪點解大多數人將怪異、恐怖、血腥、暴力、情色、變態…哩啲賣點嘅B級片電影稱為「Cult片」?
佢哋係咪真係了解B級片和Cult片嘅定義?係咪真係了解兩者有咩分別和共同點呢?

先嚟講B級片。
喺上個世紀30年代,美國大蕭條時期。荷理活卻反而出現咗「黃金時代」。有聲電影嘅出現同大量無所事事嘅平民令電影院成為最當時得令嘅娛樂場所。
與此同時,為咗吸引更多觀眾,荷理活推出咗《雙片公映》形式。
即係一部大製作電影連帶一部低成本小製作電影上映,而其中嘅大製作就稱為「A級片」,小成本製作就是「B級片」。
雖然後來荷理活為對抗電視劇發展而將注意力放喺大熒幕和立體聲等方面,雙片公映形式漸漸取消。但將哩種低成本、製作粗糙嘅電影稱為B級片嘅統稱卻流傳咗落去。

再嚟講講Cult片。
其實筆者以前喺本專欄已經講過Cult片嘅明確定義。 真正Cult片係不根據電影嘅元素,亦不根據狂熱fans嘅數量嚟定義一部電影係唔係「Cult Film」。
真正Cult Film只有兩種特點:

1.排斥主流,Cult片係游離於主流之外,唔會大唱主旋律,甚至要故意排斥主流,從意外嘅角度讓觀眾驚喜。

2.影響主流,Cult片要喺主流之外出現但又能夠影響主流電影。

從上述兩點,相信大家可以區分Cult片同普通粗糙廉價血肉橫飛B級電影最主要分別。一部真正Cult片喺橫空出世後要令觀眾驚異,要令主流以震動,要令電影藝術方面影響後世發展。例如《The Rocky Horror Picture Show》《Pink Flamingos》《Reefer Madness》等等…

但經過數十年發展後, Cult片嘅特點進化到十分明顯:廉價、粗俗、怪異、做作、各種亞文化元素跨界。
往往喺網上搵到嘅介紹都係好籠統嘅說明令Cult片難以明確定義,以至於好多擁有以上特點嘅B級電影都將其稱為Cult片。

但無論用邊種定義形式,Cult片和B級片都是不能畫等號的,更不可以有咁樣嘅定義:Cult=B級=重口味/恐怖片!!

B級片係一種較為明確嘅定義:低成本、製作粗糙、沒有大明星和精良嘅製作團隊、通常用色情、血腥、恐怖嚟做噱頭。基本上滿足到以上條件嘅電影我哋都可以稱之為B級片。

而Cult片相對更多嘅係一種態度:離經叛道,決不妥協,不屈從於主流卻可以引來支持同關注。Cult並非一種電影類別或者風格,我哋可以話Cult片係一種文化,一種電影態度。