Marvel Zombies d
Cult噏今次唔講電影,轉一轉向,我哋今次講cult漫 – 「Marvel Zombies」。

可能筆者今次開哩個題目,好多人都會話自己好少接觸美國漫畫喎。但我今次所講嘅marvel zombies有別一般,內容並唔係講d緊身衣懞面大隻佬點樣英雄俠義嘅嘢,而係講哩個世界連班超級英雄都感染咗喪屍病毒究竟會變成咩模樣呢?

相信大家都對本來「幫我哋守護哩個世界嘅人反而成為加害者」嘅劇情都唔難理解,因為其實依家香港都係咁嘅世界,如果仲係唔理解,你可以睇吓香港班警察咁你就可以明白marvel zombies係一個點嘅世界。

「Marvel Zombies」系列起源於Marvel出版社同電影"鬼玩人 The Evil Dead"合作嘅cross over,初時M社原意只係打算嘗試玩幾期短篇,但玩落之後又覺得幾好玩喎,讀者反應仲要好到收唔到手,加上推出果排啱啱撞正美國喪屍熱潮復興,無論電影,電視,games都吹緊喪屍風 。順理成章marvel zombies成為M社旗下嘅大系,之後不斷延續再延續去玩哩個喪屍劇情。

marvel zombies e

暫時成個marvel zombies系列總數有八部,包括一部前前傳,一部前傅,5部正傳,再加一部return。除咗兩部前傳1期完,其他每部都係4至5期完結。

前傳故事內容開端就係講磁力王Magneto研發咗隻喪屍病毒,佢就打算利用哩種病毒去削弱人類社會,等異變人可以乘勢而起主宰地球,但出嚟個效果遠遠大於佢想像,成為哩個marvel zombies嘅禍首。

另一邊廂另一個宇宙入面Fantastic Four神奇四俠嘅神奇先生接受到另一個平行世界嘅自己邀請去佢嘅世界參觀,但佢去到後發現奶嘢喇,原來去到果個平衡世界係一個喪屍世界,包括另一個自己嘅所有人都已經全部變晒喪屍,佢地係食到冇嘢好食所以打另一個平衡世界嘅鬼主意。

神奇先生經過一輪追逐同逃亡後,Magneto出現救走咗佢,最後亦都將個平衡世界轉移機打爆咗,前傳故事亦都完結。

之後就接到落去正傳故事 ,講述"鬼玩人 The Evil Dead"個主角Ash無喱頭咁跌咗落marvel zombies嘅世界, 有睇過鬼玩人電影都知Ash哩個人本身係好特別,佢對於死亡係無一個概念,因為佢每次一死就會跌落另一個平衡世界返生,而今次佢就跌入咗marvel個世界,其中搞笑嘅係佢以前經歷過其實世界係無超級英雄哩樣嘢, 今次跌入marvel世界佢覺得點解哩個世界咁多著緊身衣嘅小丑咁鬼馬嘅呢?

之後劇情發展係講打開喪屍經驗嘅Ash試圖幫哩個超級英雄世界解決喪屍危機,甚至召喚咗自己原本世界嘅喪屍嚟打哩班喪屍英雄,最後經歷咗幾期之後佢都係失敗咗,亦令佢再一次死亡跌入另一個平衡世界,當Ash滿天歡喜以為脫離咗喪屍危機,但鏡頭一轉嘅係佢今次跌入咗一個人狼嘅marvel世界,算係一個open ending搞笑地完結哩一部。

到咗之後果幾部都係Marvel自己打晒骰嘅zombie劇情,故事承接返Magneto打爆平衡世界轉移機果段,講班超級英雄變成喪屍嘅後續遭遇,M社自己再加上一啲幾過癮嘅補完設定,例如設定返喪屍病毒只係超級英雄先會受感染病發成為喪屍,普通人係感染只會死亡。另一個設定就係超級英雄變成喪屍之後就要不斷食人,但當食飽之後就會回復理智,但當肚餓又會失去常性。

其中一段我覺得最過癮黑色劇情就係講蜘蛛俠變成喪屍後食咗佢兩位至親 Mary Jane同Aunt May,到佢食飽咗之後,佢知道自己殺咗兩個親人,令佢非常自責同內疚 。但矛盾之處就係佢唔飽係唔會感到哩種自責,可以算得上係一個命運嘅悲劇。

而往後劇情都會描寫其他英雄清醒時都諗,自己原本係保護民眾嘅英雄,點解會墮落成用民眾果腹嘅喪屍。